Բուխարեստում կայացավ «Պարոն Ազնավուր» ֆիլմի պրեմիերան

19 մարտի, 2025

Մարտի 19-ին Բուխարեստի Էլվիրե Պոպեսկուի անվան կինոթատրոնում Ռումինիայում Հայաստանի դեսպանության, Ռումինիայում Ֆրանսիայի դեսպանության և Ֆրանսիական ինստիտուտի համագործակցությամբ կայացավ ֆրանսահայ հռչակավոր շանսոնյե Շառլ Ազնավուրի կենսագրապատում «Պարոն Ազնավուր» ֆիլմի պրեմիերան։

Ֆիլմի ցուցադրությամբ պաշտոնական մեկնարկ տրվեց Ռումինիայում Ֆրանսիական ֆիլմերի ամենամյա փառատոնին, որին այս տարի որպես գործընկեր մասնակցում է ՀՀ դեսպանությունը։ Փառատոնի շրջանակներում «Պարոն Ազնավուր» ֆիլմը և ֆրանսիական մի շարք այլ նոր ֆիլմեր կցուցադրվեն Ռումինիայի 12 քաղաքներում։

Ֆիլմի ցուցադրությանը նախորդեց կինոփառատոնի բացման ազդարարումը Ֆրանսիական ինստիտուտի տնօրեն Ժուլիեն Լյուկեզիի կողմից։ Ողջույնի խոսքով հանդես եկավ ՀՀ դեսպան Տիգրան Գալստյանը՝ ընդգծելով Շառլ Ազնավուրի կյանքի և գործունեության մեծ նշանակությունը ոչ միայն հայ և ֆրանսիացի ժողովուրդների համար, այլև ֆրանկոֆոնիայի միջազգային առաջխաղացման գործում։

Ֆիլմի ցուցադրությանը, ինչպես նաև դրան նախորդած ընդունելությանը մասնակցեցին ռումինացի պաշտոնյաներ, Բուխարեստում հավատարմագրված դիվանագիտական կորպուսի ներկայացուցիչներ, ռումինահայ համայնքի անդամներ, մշակույթի բազմաթիվ գործիչներ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր