Հայկական փառատոն և գործարար համաժողով Ռումինիայի Գեորգեն քաղաքում

04 սեպտեմբերի, 2026

Սեպտեմբերի 4-ից 6-ը Ռումինիայի Հարգիտա նահանգի Գեորգեն քաղաքում տեղի ունեցավ ամենամյա Հայկական փառատոնը, որն այս տարի նշանավորվեց տեղական և Հայաստանից ժամանած փոքր և միջին ձեռնարկությունների մասնակցությամբ գործարար համաժողովի անցկացմամբ։

Փառատոնի բացմանը մասնակցելու նպատակով Գեորգեն այցելեց Ռումինիայում ՀՀ դեսպան Տիգրան Գալստյանը՝ Ռումինիայի Պատգամավորների պալատի արտաքին հարաբերությունների հանձնաժողովի նախագահ Հայդու Գաբորի և պատգամավորներ Բենդե Շանդորի, Բոգլարկա Կանտորի և Պաուլ Կոտիրլետի հետ միասին։ Հանդիսավոր մեկնարկն ազդարարվեց Գեորգենի հունգարահայ համայնքի ղեկավար Լասլո Կուլչարի, Գեորգենի քաղաքապետ Զոլտան Նագիի և Հայաստանից ժամանած գործարարների խումբը ղեկավարող Միջազգային գործարար կապերի խորհրդի անդամ Անահիտ Սիմոնյանի կողմից։ Ներկաներին տեսաուղերձով ողջույնի խոսք ուղղեցին ՀՀ Ազգային ժողովի արտաքին հարաբերությունների հանձնաժողովի նախագահ Սարգիս Խանդանյանը և պատգամավոր Մարիա Կարապետյանը։

Գործարար համաժողովի շրջանակներում Հայաստանից ժամանած պատվիրակության ներկայացուցիչները և հեռավար մասնակիցներն ունեցան մի շարք B2B հանդիպումներ և քննարկումներ՝ ներկայացնելով իրենց ընկերությունների գործունեությունն ու արտադրանքը, ինչպես նաև գործընկերների հետ մտքեր փոխանակեցին ներդրումային և արտահանման հնարավորությունների և հետագա ուղիղ համագործակցության հեռանկարների շուրջ։

Եռօրյա փառատոնի միջոցառումներին մասնակցեցին տարածքային և տեղական իշխանությունների ներկայացուցիչներ, գործարարներ, հոգևոր դասի ներկայացուցիչներ և բազմաթիվ հյուրեր՝ հաղորդակից դառնալով Հարգիտա նահանգին բնորոշ և յուրահատուկ բազմադարյա հունգարահայ մշակույթին։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր