ՀՀ դեսպանը մասնակցել է Բուխարեստում անցկացված "Եվրոպական երկխոսություններ" միջոցառումների շարքին

05 հունիսի, 2025

Հունիսի 3-5-ը Ռումինիայում Ֆրանսիայի դեսպանության և Բուխարեստի ֆրանսիական ինստիտուտի կազմակերպմամբ տեղի է ունեցել եվրոպական մի շարք երկրների փորձագետների և ուսանողների մասնակցությամբ միջոցառումների շարք՝ "Եվրոպական երկխոսություններ" նախաձեռնության շրջանակներում։

Հունիսի 5-ին Ռումինիայում Հայաստանի դեսպան Տիգրան Գալստյանը որպես բանախոս մասնակցել է "Դիվանագիտությունը հակամարտություններով լի աշխարհում" խորագրով կլոր սեղանին, որի ընթացքում անդրադարձ է կատարվել եվրոպական տարածաշրջանում, ինչպես նաև Հարավային Կովկասում անվտանգային իրադրությանը և խաղաղության հաստատմանն ուղղված գործընթացներում դիվանագիտության դերին։

ՀՀ դեսպանն իր խոսքում նշել է, որ դիվանագիտությունը պետք է ակտիվորեն ծառայի հակամարտությունների կանխմանը և կայուն խաղաղության հաստատմանը, ոչ թե միայն դրանց հետևանքների մեղմմանը՝ ընդգծելով նաև ժողովրդավարական արժեքների և հիմնարար ազատությունների պաշտպանության առանցքային կարևորությունն արդի մարտահրավերներին հասարակությունների դիմակայունությունն ապահովելու հարցում։

Կլոր սեղանին հաջորդել է ներկաների հետ հարցուպատասխան։ "Եվրոպական երկխոսությունների" շրջանակներում հունիսի 4-ին նաև տեղի է ունեցել հանդիպում-քննարկում ֆրանսիական և ռումինական համալսարանների մի շարք ուսանողների հետ, ովքեր Ռումինիայում Հայաստանի, Ֆրանսիայի և Մարոկկոյի դեսպաններին են ներկայացրել եվրոպական տարածաշրջանում անվտանգային մարտահրավերների առնչությամբ իրենց հետազոտություններն ու եզրահանգումները։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր