Դեսպան Տիգրան Գալստյանը մասնակցել է Բուխարեստի թատրոնի և կինոյի համալսարանի` 2024-2025թթ․ ուսումնական տարվա մեկնարկին նվիրված հանդիսավոր արարողությանը

01 հոկտեմբերի, 2024

Հոկտեմբերի 1-ին Ռումինիայում ՀՀ դեսպան Տիգրան Գալստյանը մասնակցել է Բուխարեստի թատրոնի և կինոյի համալսարանի` 2024-2025թթ․ ուսումնական տարվա մեկնարկին նվիրված հանդիսավոր արարողությանը։ "Ավելի լավ միասին" խորագրով ուսումնական տարվա բացման արարողության ընթացքում տրվել է Երևանի և Բուխարեստի` արվեստի ոլորտում մասնագիտացված վերոնշյալ բարձրագույն կրթական հաստատությունների ուսանողների փոխայցելության ծրագրի մեկնարկը՝ ՀՀ դեսպանի, Ֆրանկոֆոնիայի միջազգային կազմակերպության Կենտրոնական և Արևելյան Եվրոպայի տարածաշրջանային ներկայացուցիչ Էրիկ Պոպի, Բուխարեստի թատրոնի և կինոյի համալսարանի ռեկտոր Լիվիու Լուկաչիի և Երևանի թատրոնի և կինոյի պետական ինստիտուտի ռեկտոր Սառա Նալբանդյանի ներկայությամբ։

Իր բացման խոսքում ՀՀ դեսպանը ողջունել է ՖՄԿ տարածաշրջանային ներկայացուցչության ջանքերով իրականացվող ծրագրի մեկնարկը՝ կարևորելով հայ և ռումին երիտասարդների միջև ուսանողական կապերի ակտիվացումը և դրա շարունակականությունը՝ միաժամանակ մաղթելով Բուխարեստի թատրոնի և կինոյի համալսարանի բոլոր ուսանողներին և պրոֆեսորական կազմին հաջողություններով լի ուսումնական տարի։

Նույն օրը ծրագրի շրջանակներում կայացել է երկու համալսարանների հայ և ռումին ուսանողների համատեղ թատերական ներկայացումը Սերգեյ Փարաջանովի "Նռան Գույնը" ֆիլմի մոտիվներով՝ նվիրված աշխարհահռչակ հայ կինոգործչի 100-ամյակին, որը ներառված է ՅՈՒՆԵՍԿՕ-ի նշանավոր անձանց հոբելյանների այս տարվա օրացույցում։

Ծրագիրը կշարունակվի հաջորդ տարի ռումինացի ուսանողների խմբի Հայաստան այցելությամբ:

Հոկտեմբերի 4֊ին դեսպանությունում տեղի է ունեցել հանդիսավոր ընդունելություն՝ ծրագրի մասնակից հայ և ռումին ուսանողների և դասախոսների, երկու համալսարանների ռեկտորների և ՖՄԿ տարածաշրջանային ներկայացուցչի, բազմաթիվ այլ հյուրերի և աջակիցների մասնակցությամբ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր