Բուխարեստում անցկացվել է «Strada Armeneasca» (Հայկական փողոց) ամենամյա փառատոնը

04 օգոստոսի, 2024

Օգոստոսի 2-ից 4-ը Բուխարեստում, Ռումինահայոց միության և Հայկական մշակութային կենտրոնի նախաձեռնությամբ, Ռումինիայում ՀՀ դեսպանության հետ համագործակցությամբ անցկացվել է «Strada Armeneasca» (Հայկական փողոց) ամենամյա փառատոնը, որի շրջանակներում լայնորեն հանրահռչակվել են հայկական մշակույթի ամենատարբեր ոլորտներ, ներառյալ երգ, պար, խաչքարագործություն, ասեղնագործություն, ապակու վրա նկարչություն, ծաղկարվեստ և այլն։

Երեք օր շարունակ Բուխարեստի բուսաբանական այգում տասնյակ հազարավոր հանդիսատեսների ներկայությամբ hնչել են հայ և ռումին երգիչների և համույթների երաժշտական կատարումներ, բազմաթիվ տաղավարներում ներկայացվել են հայկական ավանդույթներն ու սովորույթները, ինչպես նաև արհեստի գործեր և ցուցադրություններ։

Փառատոնի շրջանակներում կատարումներով են հանդես եկել ռումինական հայտնի Սուբկարպատ խումբը, հայկական Ջինջ խումբը Հայկ Կարոյի & Սուսաննա Նաջարյան բենդը, դիջեյ Միկոն, Պռիմա Դռագոստե ռումինական խումբը, Կարին երաժշտական համույթը, Վարդավառ համայնքային պարախումբը, ռումինացի երաժիշտներ Օվիդիու Լիպան Թանդարիկան, Ստելիու Էնաշեն և Բալկանո խումբը և երգչուհի Պաուլինան։ Փառատոնը եզրափակվել է «Եվրատեսիլ-2024» մրցույթում Հայաստանը ներկայացրած Լադանիվա խմբի համերգով։

Փառատոնի շրջանակներում կազմակերպվել է աշխարհասփյուռ հայ մշակույթի, պատմության և ներկա զարգացումների շուրջ բացօթյա քննարկումներ Ռումինիայում ՀՀ դեսպան Տիգրան Գալստյանի, Ռումինահայոց միության, Ռումինիայի գրողների միության ղեկավար Վարուժան Ոսկանյանի, Ռումինիայի խորհրդարանի պատգամավոր Վարուժան Փամբուկչյանի և ռումինահայ այլ երևելի անհատների մասնակցությամբ։

Եռօրյա փառատոնի շրջանակներում առանձին տաղավարներով ներկայացված են եղել հայկական տարազներ, գործվածքներ, ձեռագործ զարդեր, համտեսվել են հայկական խմիչք և խորտիկներ, անցկացվել են խաչքարագործության, ասեղնագործության, ծաղկարվեստի վարպետաց դասեր, մանկական ստեղծագործական խաղերի մրցույթներ։

Փառատոնին լայնորեն անդրադարձ է կատարվել ռումինական հայտնի զանգվածային լրատվամիջոցներում։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր