Դեսպան Տիգրան Գալստյանի հանդիպումները Ռումինիայի Տուլչա նահանգ կատարած այցի շրջանակներում

26 հուլիսի, 2024

Հուլիսի 26֊ին Տուլչա կատարած աշխատանքային այցի շրջանակներում Ռումինիայում ՀՀ դեսպան Տիգրան Գալստյանը հանդիպում է ունեցել Տուլչայի քաղաքապետ Շտեֆան Իլիեյի հետ։

Հանդիպմանը երկուստեք ընդգծվել է Տուլչայի հայ համայնքի դարեր ի վեր ներկայությունն ու ակտիվ դերակատարությունը քաղաքի հասարակական-քաղաքական կյանքում։

Տուլչայի քաղաքապետը ներկայացրել է քաղաքի զարգացման տեսլականը և առկա մարտահրավերները։

Դեսպան Գալստյանը գոհունակությամբ նշելով քաղաքային ղեկավարության կողմից Տուլչայի հայ համայնքի նկատմամբ ցուցաբերվող հոգածության հանգամանքը` շնորհավորել է քաղաքապետ Իլիեյին պաշտոնում վերընտրվելու կապակցությամբ։

Երկուստեք ընդգծվել է ապակենտրոնացված համագործակցության կարևորությունը հայ-ռումինական շփումների բոլոր մակարդակներով ակտիվացման համատեքստում։

Նույն օրը ՀՀ դեսպանը նաև հյուրընկալվել է Տուլչայի նահանգային խորհրդում և հանդիպել հանրային կառավարիչ Դումիտրու Մերջեանիի հետ՝ Խորհրդի նախագահի խորհրդական, Ռումինահայոց միության Տուլչայի մասնաճյուղի ղեկավար Լուչիան Սիմիոնի հետ միասին։

Հանդիպման շրջանակներում անդրադարձ է կատարվել ՀՀ Տավուշի մարզի հետ հաստատված փոխգործակցության ընդլայնման, ներառյալ փոխայցերի ակտիվացման հնարավորություններին։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր