Բուխարեստի համալսարանում կայացել է <<Հայաստանը խաչմերուկներում>> խորագիրը կրող մեկօրյա միջազգային գիտաժողովը

24 ապրիլի, 2024

Ապրիլի 24-ին Բուխարեստի համալսարանի քաղաքագիտության ֆակուլտետում կայացել է <<Հայաստանը խաչմերուկներում>> խորագիրը կրող մեկօրյա միջազգային գիտաժողովը, որը մեկնարկել է ներկաների հետ Ռումինիայում ՀՀ դեսպան Տիգրան Գալստյանի հետ երկխոսությամբ։

Գիտաժողովի շրջանակներում ելույթներով են հանդես եկել Բուխարեստի համալսարանի քաղաքական գիտությունների ֆակուլտետի դեկան Ալեքսանդրա Յանկուն, փոխդեկան Օանա-Վալենտինա Սուչիուն, Ռումինիայի ակադեմիայի քաղաքական ուսումնասիրությունների և միջազգային հարաբերությունների ինստիտուտի տնօրեն Կատալին Ավրամեսկուն, Արվեստի, պատմության ազգային ինստիտուտի դոկտոր Վլադ Բեդրոսը, Ռումինիայի դիվանագիտական ակադեմիայի փորձագիտական տնօրեն Դրագոշ Մատեեսկուն, լրագրող Ավեդիս Հաջիյանը, փորձագետներ ՀՀ-ից, Ռումինիայից, Մոլդովայի Հանրապետությունից։

Գիտաժողովի տարբեր պանելային քննարկումների ընթացքում անդրադարձ է կատարվել հայկական ինքնության մարտահրավերներին և դրսևորումներին Հայաստանում և սփյուռքում, Ռումինիայում հայկական հոգևոր-մշակութային ներկայությանը, Հայաստանի ժամանակակից արտաքին քաղաքական մարտավարությանը, տարածաշրջանային մյուս պետությունների հետ հարաբերությունների առանձնահատկություններին, Հարավային Կովկասի անվտանգության առկա մարտահրավերներին և դրանց հասցեագրման ուղիներին։

Գիտաժողովին ներկա էին Ռումինիայում հավատարմագրված դիվանագիտական կորպուսի, Ռումինիայի ակադեմիական շրջանակի ներկայացուցիչներ և համալսարականներ։

Միջոցառման նախօրեին գիտաժողովի կազմակերպիչները և պանելիստները հյուրընկալվել էին Ռումինիայում ՀՀ դեսպանությունում՝ Բուխարեստի համալսարանի քաղաքագիտության ֆակուլտետում դասախոսություններ անցկացնելու նպատակով Հայաստանից ժամանած փորձագետներին և Հայաստան կատարած ուսանողական շրջայցից վերադարձած մասնակիցներին ողջունելու կապակցությամբ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր