Դեսպան Տիգրան Գալստյանը հանդիպում է ունեցել Ռումին Ուղղափառ Եկեղեցու Պատրիարք Դանիելի հետ

14 փետրվարի, 2024

Փետրվարի 14-ին Ռումինիայում ՀՀ արտակարգ և լիազոր դեսպան Տիգրան Գալստյանը հանդիպում է ունեցել Ռումին Ուղղափառ Եկեղեցու Պատրիարք Նորին Երանելիություն Դանիելի հետ։

Հանդիպմանը Պատրիարք Դանիելն իր շնորհավորանքի խոսքն ու օրհնանքն է հղել ՀՀ դեսպանին Ռումինիայում դիվանագիտական առաքելության մեկնարկի կապակցությամբ:

Ջերմ և ծավալուն զրույցի ընթացքում անդրադարձ է կատարվել երկու ժողովուրդների քաղաքակրթական ամուր պատմական կապերին, որոնք ընկած են հայ-ռումինական բարեկամական հարաբերությունների հիմքում։ Ընդգծվել է ռումինահայության, մասնավորապես մտավորականների, մշակույթի և գիտության բնագավառի գործիչների ավանդական մեծ դերակատարությունը Ռումինիայի հասարակական կյանքում։ Ռումին Ուղղափառ եկեղեցու հոգևոր առաջնորդն առանձնացրել է Հայաստանում և Ռումինիայում ուխտագնացությունների կազմակերպումը՝ որպես երկու ժողովուրդների փոխճանաչողության մակարդակի բարձրացման գործնական միջոց։

Անդրադառնալով Լեռնային Ղարաբաղում քրիստոնեական ժառանգության պահպանման կարևորությանը՝ դեսպան Գալստյանն ընդգծել է այդ հարցում միջազգային հանրության, այդ թվում նաև միջազգային եկեղեցական համայնքի դերակատարությունը։

Պատրիարք Դանիելը նշելով երկու ժողովուրդների պատմական ընդհանուր փորձառությունը և քրիստոնեական հավատքի կարևորությունն ինքնության պահպանման գործում, իր հերթին շեշտել է քրիստոնեական ժառանգության կոթողների պահպանման և հոգևոր արժեքների առաջմղման անհրաժեշտությունը ներկայիս աշխարհաքաղաքական դժվարին ժամանակներում։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր