Դեսպան Սերգեյ Մինասյանը Գեռլայում մասնակցել է Արմենոպոլիս փառատոնին

23 օգոստոսի, 2023

Ռումինիայում Հայաստանի Հանրապետության արտակարգ և լիազոր դեսպան Սերգեյ Մինասյանը Գեռլայում (նախկինում՝ Արմենոպոլիս/Հայաքաղաք) մասնակցել է օգոստոսի 18-ից 20-ը տեղի ունեցած Արմենոպոլիս փառատոնին, որին մասնակցել է նաև Գեռլայի քույր քաղաք հանդիսացող Իջևանի համայնքապետ Արթուր Ճաղարյանը։

Միջոցառման շրջանակներում Արթուր Ճաղարյանը հանդիպումներ է ունեցել Գեռլայի քաղաքապետ Իոնել-Օվիդիու Դրագանի և նահանգի ՏԻՄ ներկայացուցիչների հետ։ Կողմերն երկուստեք բարձր են գնահատել քույր քաղաքների հարաբերությունների ձևավորման և զարգացման գործում տեղի հայ համայնքի անուրանալի դերակատարությունը։

Քննարկվել են քույր քաղաքների համագործակցության հետագա հեռանկարները, փոխգործակցության ուղիներն, ինչպես նաև առաջիկա միջոցառումներն ու ծրագրերը։

Միջոցառման ընթացքում դեսպանը և Իջևանի քաղաքապետը հանդիպումներ են ունեցել նաև Գեռլայի քույր քաղաքներ հանդիսացող մի շարք եվրոպական քաղաքների պատվիրակությունների հետ՝ այդ թվում Ֆրանսիայից, Գերմանիայից, Հունգարիայից, Շվեդիայից, Շվեյցարիայից՝ փորձի փոխանակման և նորարար գաղափարների կյանքի կոչման նպատակով։

Տեղեկանք․ Տրանսիլվանիայում հայերը հաստատվել են 10-14-րդ դարերում: 16-րդ դարի սկզբին Կիլիկիայից Ղրիմ և Մոլդովա գաղթած, ապա այստեղ հանգրվանած հայերը հիմնադրել են Արմենոպոլիս/Գեռլա քաղաքը (18-րդ դարի սկզբին և այդպես է կոչվել մինչև 1920թ.)՝ Հաբսբուրգյան կայսերական հրովարտակով, որով հայերը ստացել են տեղացիներին հավասար իրավունքներ: Քաղաքն ունեցել է «թագավորական ազատ քաղաքի» կարգավիճակ: Այն արդի Ռումինիայի եզակի բնակավայրերից է՝ կառուցված քաղաքաշինական հատուկ հատակագծով՝ բարոկկո ոճով, որ իրականացրել է հայերի հրավերով Հռոմից ժամանած հայազգի ճարտարապետ Ալեքսիսը: Մոտ մեկուկես դար քաղաքը կոչվել է Արմենոպոլիս/Հայաքաղաք, ուր գործել են հայ աշխարհիկ և հոգևոր իշխանություններ, կրթական և հասարակական հաստատություներ: Մինչև 1918թ. քաղաքապետները եղել են հայեր, իսկ քաղաքը կառավարվել է միջնադարյան հայկական օրենքներով՝ Մխիթար Գոշի «Դատաստանագրքի» սկզբունքների հիման վրա:

Այստեղ է գտնվում աշխարհի ամենաբարձր Սուրբ Երրորդության հայ կաթողիկե տաճարը (1776թ.), որտեղ գտնվում է ֆլամանդացի հայտնի նկարիչ Ռուբենսի դպրոցին վերագրվող «Խաչից իջեցումը» կտավը, որը, ըստ ավանդության, որպես երախտագիտության արտահայտություն, 1806թ. տեղի հայերին է նվիրել Ավստրոհունգարիայի կայսր Ֆրանց 1-ինը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր