Ռումինիայում Հայաստանի Հանրապետության դեսպան Սերգեյ Մինասյանի այցը Տուլչա

29 հուլիսի, 2023

Հուլիսի 28-ից 30-ը Ռումինիայում Հայաստանի Հանրապետության դեսպան Սերգեյ Մինասյանն այցելեց Ռումինիայի Տուլչա քաղաք՝ մասնակցելու Տուլչայի նահանգային խորհրդի կողմից կազմակերպված «Դելտայի ալիքներ» փառատոնին և հանրահայտ ռումինացի մարզիկ Իվան Պացայկինի անվան ծովափնյա բուլվարի բացման պաշտոնական արարողությանը, ինչպես նաև հանդիպումներ ունենալու ՏԻՄ ղեկավարների հետ։

Այցի ընթացքում դեսպան Մինասյանը մասնակցեց նաև «Ազգամիջյան» փառատոնի շրջանակներում անցկացվող հայկական մշակույթի տոնին, որը կազմակերպվել էր Ռումինիայի Հայոց միության Տուլչայի մասնաճյուղի ջանքերով (նախագահ` Սիմիոն Լուչիան Էդուարդ)։

Քաղաքի կենտրոնական հրապարակում հայկական ազգային պարերով հանդես եկան Տուլչայի «Բազմազան» և Կոնստանցիայի «Նաիրի» պարախմբերը: Հանդիսատեսը հնարավորություն ունեցավ ունկնդրելու ազգագրական ու ժողովրդական երգեր՝ տենոր Ժան Սմբատյանի կատարմամբ։

Միջոցառման շրջանակներում կայացավ ռումինահայ գրող, դոկտոր Արշալույս Սարգսյան-Գուրաուի «Հուշեր «ոսկե դարից»» գրքի շնորհանդեսը:

Տեղեկանք․ Տուլչան համանուն նահանգի վարչական կենտրոնն է, որը գտնվում է Ռումինիայի սևծովյան Դոբրոջա շրջանում: Տուլչա նահանգի և ՀՀ Տավուշի մարզի միջև եղբայրական կապեր են հաստատվել 2014թ.:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր