Աշխատանքային այցով Ռումինիայում էր Սարգիս Խանդանյանի գլխավորած պատվիրակությունը

31 մայիսի, 2023

Մայիսի 29-31-ին Ռումինիայի Պատգամավորների պալատի Արտաքին քաղաքականության հարցերով հանձնաժողովի նախագահ տկն. Բիրո Ռոզալիա-Իբոլյայի հրավերով Սարգիս Խանդանյանը, Վլադիմիր Վարդանյանը և Արսեն Թորոսյանն աշխատանքային այցով այցելել են Բուխարեստ

Այցի ընթացքում պատգամավորները հանդիպել են Ռումինիայի արտաքին գործերի նախարարության Գլոբալ հարցերի և դիվանագիտական ռազմավարությունների գծով պետքարտուղար, 2011-2015թթ. Հայաստանում ԵՄ պատվիրակության ղեկավար Տրայան Հրիսթեայի հետ։ Հանդիպման ընթացքում քննարկվել են Հայաստանի և Ռումինիայի միջև քաղաքական, տնտեսական, մշակութային և կրթական հարաբերությունների զարգացման հեռանկարները։ Քննարկվել են նաև Հայաստանի և Ադրբեջանի, ինչպես նաև Հայաստանի և Թուրքիայի միջև ընթացող բանակցությունների մանրամասները, Լեռնային Ղարաբաղում ստեղծված հումանիտար ճգնաժամը։

Հանդիպումներ են կայացել նաև Պատգամավորների պալատի Արտաքին քաղաքականության հարցերով հանձնաժողովի անդամների, խորհրդարանի փոխնախագահ, ԵԱՀԿ ԽՎ-ում Ռումինիայի պատվիրակության ղեկավար Դան Բարնայի, Եվրոպական հարցերի հանձնաժողովի նախագահ Շտեֆան Մուշոուի, ԵԽԽՎ-ում ALDE քաղաքական խմբի ղեկավար, պատգամավոր Յուլիան Բուլայի, ինչպես նաև Ռումինիայի խորհրդարանի ազգային փոքրմասնությունների պատգամավորական խմբի ղեկավար, մեր հայրենակից Վարուժան Փամբուկչյանի հետ։

Հանդիպումների ընթացքում քննարկվել են ինչպես Հայաստան-Ռումինիա, Հայաստան-ԵՄ հարաբերությունների առանձնահատկությունները, այնպես էլ տարածաշրջանի անվտանգային և հումանիտար խնդիրներ։

Սենատի Արտաքին քաղաքականության հարցերով հանձնաժողովի նախագահ Տիտուս Կորլատեանի և հանձնաժողովի անդամների հետ քննարկվել են Հայաստանի և Ռումինիայի միջև երկկողմ հարաբերությունների դինամիկան, ինչպես նաև Հայաստանի և Ադրբեջանի միջև ընթացող բանակցությունների և Լեռնային Ղարաբաղում ստեղծված հումանիտար ճգնաժամի վերաբերյալ հարցեր։

Սենատի Եվրոպական քաղաքականության հարցերով հանձնաժողովի նախագահ Վասիլե Դինկուի և հանձնաժողովի անդամների հետ խոսվել է Հայաստան-ԵՄ հարաբերությունների դինամիկայի, ինչպես նաև Հայաստանում տեղակայված ԵՄ քաղաքացիական դիտորդական առաքելության արդյունավետության մասին։ Անդրադարձ է կատարվել նաև Հայաստան-Թուրքիա կարգավորման գործընթացին։

Հանդիպումներին մասնակցել է նաև Ռումինիայում ՀՀ արտակարգ և լիազոր դեսպան Սերգեյ Մինասյանը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր