Դեսպան Մինասյանը հանդիպել է Ռումինիայի ԱԳՆ պետքարտուղար Տրայան Հրիսթեային

07 փետրվարի, 2023

Փետրվարի 7-ին կայացել է Ռումինիայում Հայաստանի Հանրապետության դեսպան Սերգեյ Մինասյանի և Ռումինիայի ԱԳՆ պետքարտուղար Տրայան Հրիսթեայի հանդիպումը։

Շնորհավորելով զրուցակցին նոր պաշտոնի ստանձնման կապակցությամբ՝ դեսպան Մինասյանը համոզմունք է հայտնել, որ պարոն Հրիսթեայի դիվանագիտական փորձառնությունը, այդ թվում նաև որպես Հայաստանում ԵՄ պատվիրակության ղեկավար, մեծապես կնպաստի իր առջև դրված պատասխանատու խնդիրների լուծմանը։

Երկուստեք կարևորվել է Հայաստանում Եվրամիության քաղաքացիական դիտորդական առաքելության տեղակայման նշանակությունը՝ որպես տարածաշրջանային խաղաղությանն և կայունությանը նպաստող գործոն։ Հույս է հայտնվել, որ էներգետիկ շահերը վեր չեն դասվի մարդու հիմնարար իրավունքներից և համամարդկային արժեքներից նաև Հարավային Կովկասում։

Դեսպան Մինասյանը զրուցակցին է ներկայացրել Ադրբեջանի կողմից Լաչինի միջանցքի ապօրինի արգելափակման հետևանքով առաջացած հումանիտար ճգնաժամի մանրամասները՝ ընդգծելով, որ Ադրբեջանի գործողությունները 2020թ. նոյեմբերի 9-ի եռակողմ հայտարարության և միջազգային հումանիտար իրավունքի նորմերի կոպտագույն խախտում են և միտված են Լեռնային Ղարաբաղի ժողովրդին էթնիկ զտմանը:

Կողմերը քննարկել են նաև հայ-ռումինական երկկողմ, ինչպես նաև բազմակողմ հարթակներում հաստատված համագործակցության հետագա ընդլայնմանն առնչվող հարցեր:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր