Ռումինիայում ՀՀ դեսպան Սերգեյ Մինասյանը հանդիպեց Ալբա Յուլիայի ռոմանո-կաթոլիկ արքեպիսկոպոս, Ռումինիայի հայ կաթոլիկ համայնքի առաքելական առաջնորդ դոկտոր Կովաչ Գերգեյին

16 ապրիլի, 2021

Ապրիլի 16-ին Ռումինիայում ՀՀ դեսպան Սերգեյ Մինասյանը հանդիպեց Ալբա Յուլիայի ռոմանո-կաթոլիկ արքեպիսկոպոս, Ռումինիայի հայ կաթոլիկ համայնքի առաքելական առաջնորդ դոկտոր Կովաչ Գերգեյին (Kovács Gergely):

Շնորհավորելով դոկտոր Գերգեյին Ռումինիայի հայ կաթոլիկ համայնքի առաքելական առաջնորդի պաշտոնում նշանակվելու կապակցությամբ՝ դեսպան Մինասյանը հույս հայտնեց, որ նորանշանակ առաջնորդը նոր լիցք կհաղորդի Ռումինիայում բնակվող հայ կաթոլիկ համայնքի հոգևոր կյանքին ու ինքնության պահպանմանը, ինչպես նաև Տրանսիլվանիայի հայ կաթոլիկ համայնքի՝ իր պատմական Հայրենիքի հետ կապերի զարգացմանը:

Հանդիպման ընթացքում կողմերը քննարկեցին նաև Տրանսիլվանիայի հայ կաթոլիկ համայնքին առնչվող հարցերի լայն շրջանակ՝ անդրադառնալով, մասնավորապես, պատմամշակութային և հոգևոր-կրոնական ժառանգության պահպանմանը:

Զրուցակիցները մանրամասն քննարկեցին անցյալ տարի աշնանն Արցախի դեմ, Թուրքիայի աջակցությամբ, Ադրբեջանի սանձազերծած ագրեսիային, դրա քաղաքական և հումանիտար հետևանքներին: Երկուստեք ընդգծվեց նաև Արցախի պատմական ու եկեղեցական ժառանգության պահպանման կարևորությունը, ադրբեջանական իշխանությունների կողմից հայկական եկեղեցական ժառանգության յուրացման քաղաքականության անթույլատրելիությունը:

Անդրադառնալով Ադրբեջանում պահվող հայ ռազմագերիների անհապաղ ազատման անհրաժեշտությանը՝ կողմերը հատուկ ընդգծեցին Սուրբ Հարության տոնի առթիվ Հռոմի Պապ Ֆրանցիսկոսի ամենամյա «Քաղաքին և աշխարհին» ուղերձում այդ հարցին անդրադառնալու կարևորությունը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր