Ռումինիայում ՀՀ արտակարգ և լիազոր դեսպան Սերգեյ Մինասյանն անդրադարձել է Լեռնային Ղարաբաղի իրավիճակի վերջին զարգացումներին և Ադրբեջանի ու Թուրքիայի կողմից իրականացվող գործողություններին

03 նոյեմբերի, 2020

Ռումինիայում ՀՀ արտակարգ և լիազոր դեսպան Սերգեյ Մինասյանի արձագանքը՝ Ռումինիայում Թուրքիայի դեսպանի STIRIPESURSE.RO-ին տրված հարցազրույցում արծարծված Հայաստանին ու Արցախին վերաբերող մտացածին թեզերին:

Հարց. Սեպտեմբերի 27-ից Լեռնային Ղարաբաղում իրավիճակն ավելի է սրվել, ինչո՞վ է դա պայմանավորված:

Սերգեյ Մինասյան. Այս տարվա սեպտեմբերի 27-ին, թուրք մասնագետների աջակցությամբ, սկսվեցին լայնամասշտաբ ռազմական գործողություններ, որոնցում ակտիվորեն օգտագործվում են սպառազինություններ, ռազմական տեխնիկա և անօդաչու սարքեր, ինչի արդյունքում ոչնչացվել են Լեռնային Ղարաբաղի (հայերեն՝ Արցախ) խաղաղ բնակավայրերը: Իրավապաշտպան կազմակերպությունների հաղորդագրությունների համաձայն՝ Լեռնային Ղարաբաղի մայրաքաղաք Ստեփանակերտը և հայկական պատմական կենտրոն Շուշի քաղաքը և այլ տեղանքներ ռմբակոծվել են ադրբեջանական բանակի կողմից, որն այդ նպատակով օգտագործել է «Սմերչ»-եր կամ թուրքական «Կասիրգա»-ներ՝ լիցքավորված կասետային մարտագլխիկներով: Ավելին, վերջին օրերին ադրբեջանական բանակը սկսել է օգտագործել ֆոսֆորային զինամթերք՝ հրդեհներ բռնկելով Լեռնային Ղարաբաղի անտառներում:

Թուրքիայի ջանքերով տարածաշրջան ներթափանցած Մերձավոր Արևելքի ահաբեկչական խմբավորումների ակտիվ աջակցությամբ՝ ադրբեջանական բանակի ռազմական գործողությունները հանգեցրել են ռազմական հանցագործությունների, խաղաղ բնակիչների սպանությունների, ռազմագերիների և խաղաղ բնակիչների նվաստացումների:

Ադրբեջանական ԶԼՄ-ները լի են այլատյացության և հայատյացության հայտարարություններով` կոչ անելով իրականացնել հայ բնակչության էթնիկական զտման քաղաքականություն ոչ միայն Լեռնային Ղարաբաղում, այլև ամբողջ աշխարհում: Փաստորեն, Ադրբեջանն ու Թուրքիան նոր պայմաններում և նոր մեթոդներով փորձում են շարունակել 100 տարի առաջ՝ Առաջին համաշխարհային պատերազմի տարիներին, Օսմանյան կայսրության նախաձեռնած ցեղասպան քաղաքականությունը:

Հարց. Ներկայումս ինչպիսի՞ն է Թուրքիայի ներգրավվածությունը Լեռնային Ղարաբաղի հակամարտության զինված փուլում:

Սերգեյ Մինասյան. Թուրքիայի ղեկավարությունը ոչ միայն չի թաքցնում իր անմիջական մասնակցությունը սեպտեմբերի 27-ին Ադրբեջանի կողմից Լեռնային Ղարաբաղի դեմ իրականացված ագրեսիային, այլև՝ հպարտորեն հրապարակում իր մասնակցությունը: Ինչպես նույնիսկ Թուրքիայի նախագահ Ռ. Էրդողանն էր նշել, հարյուր տարի անց Թուրքիան վերադառնում է Հարավային Կովկաս՝ շարունակելու իր նախնիների անավարտ աշխատանքը: Սա, ըստ էության, շարունակական ոճրագործությունների ուղղակի սպառնալիք է, որը Թուրքիան իր հովանավորյալ Ադրբեջանի հետ միասին իրագործում է՝ 1915թ. Օսմանյան կայսրությունում հայերի դեմ իրականացված ցեղասպանությունից հետո, բայց այս անգամ՝ Հարավային Կովկասում:

Թուրքական կողմը չի թաքցնում նաև այն փաստը, որ Թուրքիայի գլխավոր շտաբի ներկայացուցիչները, թուրք ռազմական հրահանգիչները և հատուկ նշանակության ստորաբաժանումների զինծառայողները անմիջական մասնակցություն են ունեցել ռազմական գործողությունների պլանավորման ժամանակ: Մարտական գործողություններում լայնորեն կիրառվում է թուրքական ժամանակակից ռազմական տեխնիկա՝ այդ թվում և «Բայրաքթար» անօդաչու թռչող սարքեր:

Այնուամենայնիվ, ամենաաղաղակողը, հավանաբար, այն փաստն է, որ Թուրքիայի նման երկիրը, հանդիսանալով ՆԱՏՕ-ի և Եվրոպայի խորհրդի անդամ և ներգրավված լինելով նաև այլ տարածաշրջանային և միջազգային կազմակերպություններում, պետական մակարդակով ներգրավված է այս հակամարտության մեջ՝ ուղղակիորեն հովանավորելով միջազգային ահաբեկչությանը՝ ներառյալ Դաեշի նախկին զինյալներին և Մերձավոր Արևելքի իսլամիստ ֆունդամենտալիստներին, Լեռնային Ղարաբաղում հայ ժողովրդի դեմ մղվող պայքարում:

Ադրբեջանական կողմում իսլամիստ ահաբեկիչների անմիջական մասնակցության փաստերը հաստատում են նաև աշխարհի խոշոր երկրների պաշտոնյաները՝ Ֆրանսիայի նախագահը, ԱՄՆ նախագահի ազգային անվտանգության հարցերով խորհրդականը, Ռուսաստանի, Իրանի և այլ երկրների բարձրաստիճանավորներ:

Վերջին օրերին դրանց միացան երկու գերևարված սիրիացի զինյալների վկայությունները, որոնք հաստատել են ինչպես թուրքական հատուկ ծառայությունների կողմից իրականացվող հավաքագրումը և ուղարկումն Ադրբեջան, այնպես էլ Ղարաբաղում իրականացվող այսպես կոչված «աշխատանքի» սարսափելի փաստերը: Փաստորեն, նրանք ոչ միայն պետք է ստանային իրենց ֆիքսված աշխատավարձը՝ իրենց թուրք և ադրբեջանցի տերերից, այլև վճարվեին լրացուցիչ 100 ԱՄՆ դոլար «անհավատներին» գլխատելու համար: Այս ամենը հաստատում է, որ Թուրքիան և Ադրբեջանը փորձում են Լեռնային Ղարաբաղի հակամարտության մեջ մտցնել քաղաքակրթությունների և դավանանքների միջև պայքարի տարրեր:

Ցավոք, մենք տեսնում ենք, որ այդ գործողություններն իրականություն են դառնում ոչ միայն Լեռնային Ղարաբաղում, այլ նաև եվրոպական շատ քաղաքների փողոցներում, ինչպես դա տեղի ունեցավ Ֆրանսիայում, Ավստրիայում կամ Գերմանիայում:

Հատկանշական է, որ ֆրանսիական եկեղեցիներում հավատացյալներին սպանողների գործողություններն արդարացնող մոլեռանդների ցույցերին՝ Ֆրանսիայի և Ավստրիայի փողոցներում, միացան նաև նրանք, ովքեր քայլում են Ֆրանսիայի քաղաքների փողոցներով ու սպառնում այնտեղ բնակվող հայերին, կամ նրանք, ովքեր վանդալիզմի են ենթարկում 1915թ. Հայոց ցեղասպանության զոհերին նվիրված հուշարձանները:

Իրականում, թուրք պաշտոնյաների արդարանալու անհաջող փորձերից զատ, անգամ նման գործողությունները Թուրքիայի ներկայիս ղեկավարության նեոօսմանյան պատրանքների և ամբիցիաների իրական արտահայտումն է:

Եվ իհարկե, մարդկության դեմ այս ակնհայտ հանցագործությունների ֆոնին ողջ միջազգային հանրությունը պետք է հանդես գա համապատասխան արձագանքներով:

https://www.stiripesurse.ro/interviu-ambasadorul-armeniei-in-romania-despre-ultimile-evolutii-ale-situatiei-din-nagorno-karabakh-si-actiunile-azerbaidjanului-si-ale-turciei_1524041.html?fbclid=IwAR3F8nnUR3haOroaTIOyhZEO53GPwLQUoHQnzI9Om2SnN0jWlq-GvLZx-KI

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր