Ռումինիայում ՀՀ արտակարգ և լիազոր դեսպան Սերգեյ Մինասյանը Ռումինիայի Բոտոշան քաղաքում մասնակցեց ծնունդով Բոտոշանից հայտնի ռումինահայ նկարիչ Անդրոնիկ Ցըրանուի անվան մրցույթ-ցուցահանդեսի 2-րդ թողարկմանը

19 սեպտեմբերի, 2020

Սեպտեմբերի 19-ին Ռումինիայում ՀՀ արտակարգ և լիազոր դեսպան Սերգեյ Մինասյանը Ռումինիայի Բոտոշան քաղաքում մասնակցեց ծնունդով Բոտոշանից հայտնի ռումինահայ նկարիչ Անդրոնիկ Ցըրանուի/ Andronic Ţăranu անվան մրցույթ-ցուցահանդեսի 2-րդ թողարկմանը, որը կազմակերպվել էր Ռումինիայի Հայոց միության Բոտոշանի մասնաճյուղի նախագահ Քրիստիան Լազարովիչի նախաձեռնությամբ: Միջոցառումը նվիրված էր ՀՀ անկախության 29-րդ տարեդարձին։

Մրցույթի մասնակիցներ Քրիստիան Բըրզոյեշն/Cristian Bârzoieș ու Ռոդիկա Տոդիրիշկըն/Rodica Todirişcă արժանացան Ռումինիայում ՀՀ դեսպանության պատվավոր մրցանակներին: Պարգևատրման արարողության ժամանակ դեսպան Մինասյանը շնորհակալություն հայտնեց համայնքի ղեկավարներին ու անդամներին՝ նշելով, որ բարձր է գնահատում Ռումինիայի հողում հայկական ինքնության պահպանման նպատակով նրանց գործադրած ջանքերը, ինչին ավելացել է նաև Հայրենիքի հետ հաստատած սերտ կապերն ամրապնդելու մեծ ցանկությունը: Շարունակելով իր խոսքը՝ դեսպան Մինասյանը հավելեց. «Այսօր ռումինահայությունը շարունակում է ապրել Հայաստանի հաջողություններով ու մարտահրավերներով, ինչի վառ ապացույցն էր 2020թ. հուլիսին հայ-ադրբեջանական սահմանային լարվածության օրերին իրենց պատմական Հայրենիքին նրանց ցուցաբերած բարոյական աջակցությունը»։

Մրցույթ-ցուցահանդեսին հաջորդեց ֆոտոլրագրող Անդրեա Տանասեի «Հայերը Ռումինիայում. մեր կողքի մարդկանց պատմությունները» լուսանկարչական ցուցահանդեսը:

Միջոցառումները, որոնց ներկա էին նաև Ռումինիայի խորհրդարանի պատգամավոր, Ռումինահայոց միության նախագահ Վարուժան Ոսկանյանը, Ռումինիայի խորհրդարանի պատգամավոր, Ռումինահայոց միության փոխնախագահ Վարուժան Փամբուկչյանը, Ռումինիայի հայ համայնքի տասնյակ ներկայացուցիչներ ու բազմաթիվ օտարազգիներ, լայնորեն լուսաբանվել է տեղական հեռուստատեսության և մամուլի կողմից:

Բոտոշան կատարած այցի ընթացքում դեսպան Մինասյանը ծանոթացավ Բոտոշանի հայկական ժառանգությանն ու պատմական և ճարտարապետական հուշարձանների պահպանությանը վերաբերող այժմէական մի շարք հարցերի, ինչպես նաև քաղաքի բնապատմական ու զբոսաշրջային միջավայրին և հնարավորություններին:

Տեղեկատվություն։ Այս տարի լրանում է Անդրոնիկ Ցըրանուի մահվան 90-ամյակը, ով ընկերական հարաբերություններ է ունեցել Միհայ Էմինեսկուի և Ջորջ Էնեսկուի հետ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր