Սեպտեմբերի 12-13-ին Ռումինիայի Ռոման քաղաքում կայացան Կարապետ Իբրըիլյանուին և Միհաիլ Ժորային նվիրված ազգային փառատոնները

15 սեպտեմբերի, 2020

Սեպտեմբերի 13-ին Ռումինիայում ՀՀ դեսպան Սերգեյ Մինասյանն այցելեց Ռոման քաղաք՝ մասնակցելու ռումինահայ ականավոր գրող, բանասեր, թարգմանիչ Կարապետ Իբրըիլյանուին նվիրված ազգային փառատոնի 3-րդ և հանրաճանաչ ռումինահայ կոմպոզիտոր, դաշնակահար ու դիրիժոր Միհաիլ Ժորային նվիրված ազգային փառատոնի 1-ին թողարկումներին:

Միջոցառմանը, որը կազմակերպվել էր Ռումինիայի Հայոց միության Ռոմանի մասնաճյուղի նախագահ Էմմանուել Նազարեթյանի նախաձեռնությամբ, մասնակցում էին Ռումինիայի անվանի գրականագետներ, արվեստաբաններ և ասմունքողներ:

Փառատոնների շրջանակներում տեղի ունեցավ մրցանակաբաշխության արարողություն, որը վարում էր Ռումինիայի գրողների միության փոխնախագահ, Ռումինահայոց միության նախագահ Վարուժան Ոսկանյանը։

Միջոցառումների ավարտից հետո դեսպան Մինասյանը հարցազրույց տվեց ռումինական TVR հեռուստաալիքին՝ հատուկ ընդգծելով նման միջոցառումների անցկացման կարևորությունը, քանզի դրանք ևս մեկ անգամ փաստում են ռումինահայ համայնքի կարևոր դերակատարությունը Ռումինիայի գրականության, արվեստի և մշակույթի բնագավառներում:

Փառատոնները լայնորեն լուսաբանվել են տեղական հեռուստատեսության և մամուլի կողմից:

Տեղեկանք. Նեամց նահանգի վարչական կենտրոն Ռոման քաղաքը Ռումինիայի պատմական հայտնի քաղաքներից է, ուր հայերը բնակվել են դեռևս միջնադարից: Քաղաքում է գտնվում 1609թ. կառուցված Սբ. Աստվածածին հայկական եկեղեցին, հարակից նախկին հայկական դպրոցը: 2019թ. հունիսի 23-ին ստորագրվել է Դիլիջան և Ռոման քույր քաղաքների միջև փոխգործակցության մասին հուշագիրը: 2015թ-ից Ռոմանում գործում է Ռումինիայի Հայոց Միության տեղական մասնաճյուղը, որը ջանքեր է գործադրում հայապահպանության, Ռոմանի և Դիլիջանի միջև մշակութային, կրթական և այլ ծրագրերի իրականացման ուղղությամբ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր