Հայոց ցեղասպանության 105-րդ տարելից

22 ապրիլի, 2020

Սիրելի հայրենակիցներ և Ռումինիայում բնակվող բարեկամներ,

Ապրիլի 24-ին համայն հայությունը և ամբողջ առաջադեմ մարդկությունը աննկուն է ոգեկոչելու Հայոց ցեղասպանության 105-րդ տարելիցը:

Թեև այս տարի COVID-19 համավարակն իր ազդեցությունն է թողնում ինչպես աշխարհում, այնպես էլ Հայաստանում ընթացող իրադարձությունների ու միջոցառումների վրա, այդուհանդերձ այդ օրը մենք կարող ենք ապահովել մեր խորհրդանշական ներկայությունը՝ կատարելով հետևյալ քայլերը.

Ապրիլի 23-ին, Երևանի ժամանակով ժամը 21:00 (Ռումինիայի ժամանակով 20:00), 3 րոպե ղողանջելու են հայկական եկեղեցիների զանգերը, ինչի ներքո մարելու են Երևանի և Հայաստանի մարզերի հրապարակների, փողոցների լույսերը: Կոչ ենք անում մարել նաև Ձեր բնակարանների լույսերը ու պատուհանի մոտ վառել մոմեր կամ միացնել հեռախոսների լապտերների լույսը: Այս գործողությունն իր խորհրդանշական արձագանքը ստանալու է Ծիծեռնակաբերդից, որին կարող եք հետևել Հայաստանի հանրային հեռուստաընկերության ուղիղ եթերով:

Ապրիլի 24-ին` Հայոց Ցեղասպանության սուրբ նահատակների հիշատակության օրը, Երևանի ժամանակով ժամը 12։00-ին (Ռումինիայի ժամանակով 11:00) Բուխարեստի Սբ․ Հրեշտակապետեր Միքայել և Գաբրիել հայկական եկեղեցում, ինչպես և աշխարհի բոլոր հայկական եկեղեցիներում հնչելու են զանգերը՝ ի ոգեկոչումն Հայոց Ցեղասպանության զոհերի հիշատակի: Զանգերի ղողանջումից հետո կկատարվի Հայոց Ցեղասպանության սուրբ նահատակների բարեխոսական կարգ` հանդիսապետությամբ գերաշնորհ Տ. Տաթև եպիսկոպոս Հակոբյանի: Ավարտին Ռումինիայում ՀՀ դեսպան Սերգեյ Մինասյանը, Ռումինիայի խորհրդարանի պատգամավոր, ՌՀՄ նախագահ Վարուժան Ոսկանյանը և Ռումինիայի հայոց թեմի առաջնորդ և Բուլղարիայի հայոց թեմի Առաջնորդական Տեղապահ գերշ. Տ. Տաթև եպիսկոպոս Հակոբյանը բոլորի անունից ծաղիկներ կխոնարհեն եկեղեցու բակում գտնվող խաչքարի մոտ:

Նույն օրը ժամը 08:00-ից սկսած, կարող եք Ձեր տվյալներով (անուն, ազգանուն) հաղորդագրություն ուղարկել 0037433191500 համարին արտասահմանից՝ հաստատելու Ձեր հեռակա մասնակցությունը օրվա խորհրդին: Հաղորդագրություն ուղարկած քաղաքացիների անունները կարտացոլվեն Հայոց ցեղասպանության զոհերի հուշահամալիրի սյուներին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր