Բուխարեստում տեղի ունեցավ Սումգայիթյան ողբերգության 32-րդ տարելիցին նվիրված միջոցառում

26 փետրվարի, 2020

Փետրվարի 26-ին Բուխարեստում տեղի ունեցավ Սումգայիթյան ողբերգության 32-րդ տարելիցին նվիրված միջոցառում: Հայկական Սուրբ Հրեշտակապետաց առաջնորդանիստ եկեղեցում Ռումինիայի Հայոց թեմի առաջնորդ Տեր Տաթև եպիսկոպոս Հակոբյանի հանդիսապետությամբ կատարվեց հոգեհանգստյան պաշտոն՝ ի հիշատակ Սումգայիթյան կոտորածների անմեղ նահատակների:

Այնուհետև, եկեղեցու բակում կանգնեցված խաչքարի մոտ Ռումինիայում Հայաստանի Հանրապետության դեսպանության անձնակազմի, Ռումինահայոց թեմի ու ծխական խորհրդի անդամների և Ռումինիայի Հայոց միության և համայնքի ներկայացուցիչների մասնակցությամբ տեղի ունեցավ հուշապսակների զետեղման արարողություն:

Իր ելույթում Ռումինիայում Հայաստանի Հանրապետության արտակարգ և լիազոր դեսպան Սերգեյ Մինասյանն անդրադարձավ 1988թ. փետրվարի վերջին սովետական Ադրբեջանի իշխանությունների գիտությամբ ու թողտվությամբ Սումգայիթում խաղաղ հայ բնակչության դեմ կազմակերպված կոտորածներին ու բռնություններին:

Դիմելով ներկաներին դեսպանը հավելեց, որ այս վայրագությունների կազմակերպիչներն ու կատարողները միջազգային հանրության կողմից արժանվույնս չեն դատապարտվել և համապատասխան պատժի չեն արժանացել` ընդամենը երկու տարի անց Բաքվում և Ադրբեջանի հայաբնակ այլ վայրերում բնակվող խաղաղ հայ բնակչության դեմ ծնելով նոր ոճրագործություններ:

Ավարտելով իր խոսքը՝ նա նաև նշեց, որ Սումգայիթի կոտորածների հիշատակը վառ պահելը պետք է հանդիսանա համայն հայության միասնական նպատակը՝ այդ գործում կարևորելով պետության, եկեղեցական և համայնքային կառույցների միասնականությունն ու համագործակցությունը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր