Հայոց ցեղասպանությանը նվիրված միջոցառում Գեորգեն քաղաքում

04 մայիսի, 2017

Կիրակի, ապրիլի 30-ին Ռումինիայի Հարգիտայի մարզի/Harghita Գեորգեն քաղաքի/Gheorgheni Հայ կաթոլիկ եկեղեցում նշվեց Հայոց ցեղասպանության 102-ամյակը: Հիշատակի միջոցառմանը ներկա էին Հարգիտայի նահանգային խորհրդի փոխնախագահ Բարտի Տիհամերը/Barti Tihamer, Գեորգենի քաղաքապետ Զոլտան Նագին/Nagy Zoltan, Էթնոգրաֆիկ թանգարանի տնօրեն Տիբոր Չերգոն/Csergo Tibor, ինչպես նաեւ Տրանսիլվանիայի Հունգարահայ միության նախագահ Աթիլա Պուշկաշը/Puskas Attila, Գեորգենի կաթոլիկ հայերի միության նախագահ Լասլո Կուլչարը/Kulcsar Laszlo եւ Ծխական խորհրդի ատենապետ Գյուլա Բուշլիգը/Buslig Gyula: Գեորգենի Հայ կաթոլիկ եկեղեցու հոգեւոր հովիվ Հունոր Գալի խոսքից հետո, որով նա պատգամեց մշտապես հիշել մարդկության դեմ գործված այդ հանցագործությունը եւ դրա մասին ուսուցանել երիտասարդ սերնդին, տիկին Գյոնգիվեր Բարաբասը/Barabas Gyongyver ներկայացրեց Հայոց ցեղասպանության պատմությունը: Միջոցառման ավարտին եկեղեցական երգչախմբի կատարմամբ հնչեց Հայաստանի հիմնը երգեհոնահար Ժոլտ Բիրոյի/Biro Zsolt եւ պատանի փողհար Աթիլա Սասկա Մագյարի/Attila Saska MAgyari նվագակցությամբ, ծաղկեպսակներ զետեղվեցին եկեղեցու բակում Նահանգային խորհրդի, քաղաքապետարանի, թանգարանի եւ տեղի հայ համայնքի կողմից 2015թ. բացված Հայոց ցեղասպանության հուշարձանին:

Գեորգենը` պատմական Ջուրջով քաղաքը, որտեղ հայերը հաստատվել են դեռեւս 17-րդ դարում եւ մինչեւ այժմ պահպանում են հայկական ավանդույթները եւ մշակույթը, եղբայրացած է Հայաստանի Ալավերդի քաղաքի հետ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր