Ապրող հիշողություն

30 մարտի, 2017

Ռումինիայի պատմական Տրանսիլվանիայի Մուրեշ/Mures նահանգի վարչական կենտրոն Թըրգու Մուրեշ/Targu Mures քաղաքում սկսել է հրատարակվել տեղի հայոց «Հունգարահայեր. Ապրող հիշողությունը» (Magyarőrmeny. Élő orokseg) հանդեսը: Գունավոր պատկերազարդ այս հանդեսի հիմնադիրներն են Թըրգու Մուրեշի Հունգարահայոց մշակութային միության նախագահ Աթիլա Պուշկաշը/Puskas Attila եւ լրագրող Ժոլտան Բակոն/Zoltán Bakó: «Ապրող հիշողություն» հանդեսը տեղի հայերի, ինչպես նաեւ օտարների համար ներկայացնում է հայ մշակույթը, հայերի ծագումնաբանությունը, դիցաբանությունը, խոհանոցը, Տրանսիլվանիայի հունգարախոս հայ համայնքի կյանքը եւ այլն:Տրանսիլվանիայի հայերը դարեր առաջ են տեղափոխվել այս շրջան` ստեղծելով Կենտրոնական եւ Արեւելյան Եվրոպայի առաջին հայկական գաղթօջախներից մեկը: Թեեւ Ավստրո-հունգարական տիրապետության շրջանում, ունեցվածքային եւ առեւտրական հավասար իրավունքներ ձեռք բերելու համար նրանք 300 տարի առաջ ստիպված դավանափոխ են եղել եւ ձուլվել տեղի հունգարական կաթոլիկ միջավայրի մեջ` մինչեւ այսօր պահպանում են հայկական ավանդությունները հայ կաթոլիկ եկեղեցու ներսում, որտեղ պատարագը մատուցվում է հայ-կաթոլիկ ծիսակարգով եւ ժամերգությունը հայերեն լեզվով: Վերջին քառորդ դարում հիմնվել են նաեւ հայկական միություններ եւ կապ հաստատվել Ռումինահայոց միության եւ Հայաստանի հետ, որի շնորհիվ տեղի է ունենում վերադարձ դեպի հայկական արմատները:

Հանդեսը հիմնականում ուղղված է տեղի հայ երիտասարդությանը, ուստի նրանց համար ներկայացվում են տրանսիլվանահայ ընտանիքների նկարներ եւ պատմություններ, հայկական ավանդույթները, ինչպես նաեւ ներկայումս Տրանսիլվանիայի հայ համայնքներին առնչվող իրադարձությունները: Հայկական խոհանոցին զուգահեռ ներկայացվում են նաեւ Ռադիո Երեւանի մասին հումորային էջերը, որոնք բավականին սիրված են այս տարածաշրջանի բնակչության կողմից:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր