Ռումինիայում Հայաստանի դեսպանություն

Հայկական միջոցառումներ Ռումինիայի Մարամուրեշ նահանգում

27 մարտի, 2017

Շիմոն Հոլոշին (1868-1916), հայկական անունով Կորբուլյան, ծնվել է այն ժամանակ Ավստո-հունգարական կայսրության մեջ մտնող Սիգետու Մարմացիեյ քաղաքում, ունեւոր հայի ընտանիքում: Համարվում է 19-րդ դարի հունգարական նկարչության նատուրալիզմի եւ ռեալիզմի ամենակարկառուն ներկայացուցիչը, Բայա Մարեի նկարչական դպրոցի հիմնադիրը: Հոբելյանական միջոցառմանը նկարչի հորենական տան պատին բացվեց ցուցանակ` «Այս տան մեջ ծնավ եւ ապրեցավ Շիմոն Հոլոշի Կորպուլյան, նկարիչ եւ պրոֆեսոր, Պայա Մարեի նկարչական դպրոցի հիմնադիր» ռումիներեն, հայերեն եւ հունգարերեն եռալեզու գրությամբ: Այնուհետեւ Սիգետու Մարմացիեյ քաղաքի Մարամուրեշի թանգարանում տեղի ունեցավ գիտական սեմինար, որի ընթացքում Կլուժի Հայագիտության ինստիտուտի տնօրեն Լուչիան-Նաստասե Կովաչը/Lucian Năstasa-Kovacs ներկայացրեց նկարչի կյանքը եւ գործունեությունը: Ողջույնի խոսքերով հանդես եկան դեսպան Համլետ Գասպարյանը, ՌՀՄ նախագահ Վարուժան Ոսկանյանը եւ Սիգետու Մարմացիեյի քաղաքապետ Հորիա Սկուբլին/Horia Scubli: Թանգարանի սրահում կազմակերպվել էր նաեւ Բայա Մարեում Հայոց միության կենտրոնին կից «Շիմոն Հոլոշի» նկարչական դպրոցի սաների աշխատանքների ցուցահանդես «Ռումինիայի հայկական եկեղեցիները» թեմայով:

Մարամուրեշի հայերը եւ Ռումինիայի տարբեր հայկական համայնքից ժամանած հյուրերն այցելեցին նաեւ քաղաքային գերեզմանոց եւ ծաղկեպսակներ դրեցին նշանավոր նկարիչ շիրիմին:

Օրվա երկրորդ կեսին կազմակերպվեց այց Յոան Միհալի դե Ապշայի տուն- թանգարան/Casa Ioan Mihaly de Apşa, որտեղ ցուցադրված է Շիմոն Հոլոշիի «Հուստուլուի ամրոցը»/“Cetatea Hustului” կտավը, իսկ երեկոյան տեղի ունեցավ ռումինա-հայկական ազգային երաժշտության համերգ, որի ընթացքում հանդես եկավ Գեռլայի «Հայաքաղաք» պարախումբը:

Միջոցառումների ընթացքում հանդիսավորապես բացվեց ՌՀՄ Բայա Մարեի մասնաճյուղի գրասենյակը` հիմնադիր նախագահ Սորին Գդլեան/Sorin Gadalean, ինչպես նաեւ Բայա Մարեի քաղաքային գրադարանում եւ Սիգետու Մարմացիեյի Մարամուրեշի թանգարանում տեղի ունեցան Վարուժան Ոսկանյանի «Պատերազմի զավակները» վեպի շնորհանդեսները:

Սիգետու Մարմացիեյ կատարած այցի ընթացքում դեսպան Գասպարյանն առանձին զրույց ունեցավ քաղաքապետ Հորիա Սկուբլիի հետ, ինչպես նաեւ Վարուժան Ոսկանյանի հետ միասին այցելեց հրեա նշանավոր գրող եւ փիլիսոփա Էլի Վիզելի/Elie Wiesel տուն թանգարան:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր