Դեսպան Գասպարյանը մասնակցեց Հոլոքոստի զոհերի հիշատակի միջազգային օրվա միջոցառումներին:

30 հունվարի, 2017

Հունվարի 27-ին Ռումինիայում Հայաստանի դեսպան Համլետ Գասպարյանը Ռումինիայի Հրեական համայնքների ֆեդերացիայի հրավերով Բուխարեստում մասնակցեց Հոլոքոստի զոհերի հիշատակի միջազգային օրվա միջոցառումներին: Դեսպանը ներկա եղավ պատմական հրեական թաղամասում գտնվող Մեծ Սինագոգին հարող պուրակը գլխավոր ռաբին, պատմաբան եւ գրող Ալեքսանդրու Շաֆրանի/Alexandru Safran անունով կոչելու արարողությանը, որին մասնակցում էին նաեւ Ռումինիայի Խորհրդարանի, կառավարության եւ քաղաքային իշխանությունների ներկայացուցիչները, Իսրայելի, ԱՄՆ-ի եւ Գերմանիայի դեսպանները, մտավորականներ, լրագրողներ, հրեական համայնքի անդամներ:

Այնուհետեւ մեծ Սինագոգում կազմակերպվեց 1941թ. հունվարին Բուխարեստի ջարդին նվիրված սիմպոզիում: Ռումինիայի հրեաները, որոնց թիվը Երկրորդ համաշխարհային պատերազմից առաջ, ըստ տարբեր տվյալների, հասնում էր 750-850 հազարի, այդ տարիներին դաժան հալածանքների ենթարկվեցին մարշալ Իոն Անտոնեսկուի ազգայնամոլ վարչակարգի եւ լեգեոներական ծայրահեղական շարժման կողմից: Նրանցից շատերը կոտորվեցին, նետվեցին բանտեր եւ համակենտրոնացման ճամբարներ, մոտ 320 հազարը արտաքսվեց երկրից դուրս` դառնալով նոր հալածանքների զոհ: Այսօր հրեաների թիվը Ռումինիայում կազմում է ընդամենը 7.000: Ռումինիան 2004թ. պաշտոնապես ճանաչել է Հոլոքոստը` Անտոնեսկուի վարչակարգի եւ լեգեոներական շարժման ոճիրները: 2016թ. մարտից Ռումինիան ստանձնել էր Հոլոքոստի հիշատակման միջազգային ալյանսի/IHRA մեկտարյա ռոտացիոն նախագահությունը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր