„Հայկական” Դումբրավենում անցկացվեց ամենամյա մշակութային փառատոնը

26 հուլիսի, 2015

Հուլիսի 24-26-ին Ռումինիայի Դումբրավեն/Dumbraveni քաղաքում անցկացվեց Դումբրավենի Դասական երաժշտության ազգային փառատոնի 3-րդ թողարկումը: Այս անգամ Դումբրավենի քաղաքապետարանը եւ Ռումինիայի Հայոց Միության Դումբրավենի մասնաճյուղը Ռումինիայում ՀՀ դեսպանի հովանու ներքո Տրանսիլվանիայի „հայկական” քաղաքում համախմբել էին դասական երաժշտարվեստի բարձրակարգ խմբերի, անվանի արվեստագետների եւ մտավորականների:

Փառատոնի շրջանակներում 300-ամյա հայ կաթողիկե Սբ. Եղիսաբեթ տաճարում հանդես եկան Վիոլոչելիսիմո/Violocelissimo թավջութակահարների խումբը, Կախարդական ֆլեյտա/Flautul Fermecat նախագիծը, որը միավորել է դաշնակահար Հորիա Միհայիլին/Horia Mihail և ֆլեյտահար Իոն Բոգդան Շտեֆանեսկուին/Ion Bogdan Ştefănescu, Կլուժ-Նապոկայի ազգային օպերայի Անաթոլիս/Anatholis վոկալ խումբը: Ծրագրի մեջ ընդգրկված էին նաեւ հայ կոմպոզիտորների գործեր:

Հուլիսի 25-ին Ապաֆի ամրոցում` Տրանսիլվանիայի Հայոց թանգարանում, բացվեցին Ռուբեն Գալիչյանի «Հայացք Հայաստանի պատմությանը քարտեզագրության միջոցով» ցուցահանդեսը, ինչպես նաև ռումին ժամանակակից նկարիչներ Հորեա Կուչերզանի/Horea Cucerzan և Լեվենտե Ցատլոսի/Levente Csatlos աշխատանքների ցուցահանդեսը:

Միջոցառումներին ողջույնի եւ գնահատանքի խոսքերով հանդես եկան դեսպան Համլետ Գասպարյանը, Դումբրավենի քաղաքապետ Ջորջետա Իրիմիեն/Georgeta Irimie, կազմակերպիչներից դոկտ. Վասիլե Հաբորը/Vasile Habor, նշանավոր գրող եւ նկարիչ, Բուխարեստի գեղարվեստի համալսարանի պրոֆեսոր Գեորգե Անգելը/Gheorghe Anghel:

Փառատոնի շրջանակներում դեսպան Գասպարյանը ապակենտրոնացված մակարդակով կապերը աշխուժացնելու շուրջ խորհրդակցություններ ունեցավ քաղաքապետ Ջորջետա Իրիմիեի հետ, վերջինիս փոխանցեց Նոյեմբերյանի քաղաքապետ Վանուշ Ամիրաղյանի շնորհավորական ուղերձը:

Տեղեկանք: Ռումինիայի Սիբիու նահանգի Դումբրավեն քաղաքը համարվում է Տրանսիլվանիայի “հայկական քաղաքներից” մեկը, ուր հայերը հաստատվել են 17-րդ դարի վերջում եւ մեծապես նպաստել քաղաքի զարգացմանը: Այսօր դեռեւս կանգուն են հայերի կառուցած եկեղեցիները, դպրոցները, վարչական եւ թաղական շենքերը: Քաղաքում դեռեւս արթուն է հայկական ոգին, չորս տարի առաջ այստեղ բացվեց Տրանսիլվանիայի Հայոց թանգարանը, գործում է “Սուրբ Եղիսաբեթ հայոց միությունը”, որի ղեկավարն է անխոնջ Իոն Կալինեսկուն/Ion Calinescu: Ամեն տարի օգոստոսի կեսերին Դումբրավենի Սբ. Եղիսաբեթ հայ կաթոլիկ տաճարում հայկական ծեսով նշվում է Սուրբ Աստվածածնի վերափոխման տոնը, որը հավաքում է ռումինաբնակ հայերին:

Հայաստանի դեսպանության նախաձեռնությամբ, 2012թ. հոկտեմբերին բարեկամության համաձայնագիր է ստորագրվել Դումբրավենի եւ Նոյեմբերյանի միջեւ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր