ՀՀ դեսպանության մասնակցությունը Կակաչների սիմֆոնիա միջազգային փառատոնին

11 ապրիլի, 2014

Ապրիլի 11-ին Ռումինիայում ՀՀ դեսպանությունը մասնակցեց Ռումինիայի Պիտեշտ/Pitesti քաղաքում անցկացվող` Կակաչների սիմֆոնիա 37-րդ ամենամյա փառատոնին:

Միջոցառմանը Ռումինիայում ՀՀ դեսպանությունը ներկայացնում էր նաեւ Հայաստանի Գյումրի քաղաքը, որը 2012թ. հոկտեմբեր ամսին եղբայրացման հուշագիր է ստորագրել Պիտեշտի հետ: Այդ առիթով, քաղաքագլուխ Տուդոր Պենդիուկին/Tudor Pendiuc փոխանցվեց Գյումրու քաղաքապետ Սամվել Բալասանյանի շնորհավորական ուղերձը, որում մասնավորապես պատրաստակամություն է հայտնվում ակտիվացնելու Պիտեշտի հետ բազմաոլորտ համագործակցությունը և այդ նպատակով իրականացնել փոխայցելություններ: Պիտեշտի քաղաքապետի հետ մտքեր փոխանակվեցին այս ուղղությամբ հետագա քայլերի շուրջ:

Միջոցառմանը ներկա էին Ռումինիայի Սենատի նախագահ Կալին Պոպեսկու-Տարիչեանուն/Calin Popescu-Tariceanu, փոխվարչապետ Լիվիու Դրագնեան/Liviu Dragnea, եվրոպառլամենտի պատգամավոր Վիորիկա Դանչիլան, Հայաստանի, Բելգիայի, Նիդեռլանդների, Մոլդովայի, Սերբիայի, Բոսնիա-Հերցեգովինայի, Մակեդոնիայի, Բրազիլիայի, Պորտուգալիայի, Ինդոնեզիայի դիվանագիտական առաքելությունների ներկայացուցիչները, պատգամավորներ, սենատորներ, Պիտեշտի հետ եղբայրական կապեր հաստատած եվրոպական երեք քաղաքների պատվիրակություններ:

Միջոցառումը մեկնարկեց Պիտեշտի կենտրոնում` քաղաքապետարանի դիմաց կազմակերպված ծաղիկների շքերթով: Ծաղիկների եւ դեկորատիվ բույսերի հարյուրավոր արտադրողներ եւ վաճառողներ ողջ Ռումինիայից եւ աշխարհի տարբեր երկրներից իրենց առաջարկներն էին ներկայացրել “Գրքի տուն” ցուցահանդեսային համալիրում:

Կակաչների սիմֆոնիան Ռումինիայում ծաղիկների ցուցադրության ամենահայտնի միջոցառումն է, որը սկիզբ է առել 1978թ.` տարեցտարի ավելացնելով մասնակիցների եւ ցուցադրվող արտադրանքի քանակը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր