Դեսպան Սերգեյ Մինասյանն այցելել է Ռումինիայի Արջեշ նահանգ

24 օգոստոսի, 2022

Օգոստոսի 22-ից 23-ը Ռումինիայում Հայաստանի Հանրապետության դեսպան Սերգեյ Մինասյանն այցելեց Ռումինիայի Արջեշ նահանգ։

Կարևոր պատմական ու հոգևոր նշանակություն ունեցող Կուրտեա դե Արջեշ քաղաքում դեսպանը հանդիպեց փոխքաղաքապետ Ստեֆան Դումիտրախեին, քննարկվեց երկկողմ հետաքրքրություն ներկայացնող հարցերի լայն շրջանակ՝ այդ թվում և Հայաստանի համապատասխան քաղաքի հետ համագործակցություն հաստատելու հնարավորությունները։

Զրուցակիցներն երկուստեք ընդգծեցին տեղի փոքրաթիվ, բայց ակտիվ հայ համայնքի` ի դեմս Արջեշ նահանգի մշակույթի և արվեստի կենտրոնի տնօրեն Արաքսի Նեգոշեանուի, ներգրավվածության կարևորությունը հաստատվող հարաբերությունների աշխատանքներում։

Այցի ընթացքում դեսպանը նաև այցելեց Ռումինահայոց միության կողմից կազմակերպված հայկական երիտասարդական ճամբար, որի մասնակիցները ժամանել էին Ռումինիայի տարբեր նահանգներից։ Դեսպան Մինասյանը հանդես եկավ դասախոսությամբ՝ ներկայացնելով Հայաստան-Սփյուռք հարաբերությունները և Սփյուռքի հայկական համայնքներում հայապահպանության արդի մարտահրավերները։

Դասախոսություններով հանդես եկան նաև Ռումինահայոց միության նախագահ, Ռումինիայի գրողների միության փոխնախագահ Վարուժան Ոսկանյանը և Ռումինիայի խորհրդարանի պատգամավոր, Ռումինահայոց միության փոխնախագահ Վարուժան Փամբուկչյանը։

Տեղեկանք․ Ռումինիայի թագավորական ընտանիքի ավանդական դամբարանը հանդիսանում է Կուրտեա դե Արջեշ տաճարը, որը գտնվում է Կուրտեա դե Արջեշ վանքի տարածքում: Վանքն աչքի է ընկնում կովկասյան ազդեցությունը կրած հարուստ հարդարանքով և ճարտարապետական առանձնահատուկ տարրերով։

Որոշ պատմաբաններ առաջ են քաշում Արջեշի և միջնադարյան Հայաստանի պատմական Արճեշ քաղաքի նույնանման լինելու վարկածը՝ կարծիք հայտնելով, որ ամենայն հավանականությամբ այն հիմնադրել են պատմական Հայաստանից Ռումինիա տեղափոխված հայերը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր