Դեսպան Սերգեյ Մինասյանն աշխատանքային այց է կատարել Տիմիշ նահանգի Տիմիշոարա քաղաք

06 օգոստոսի, 2022

Օգոստոսի 5-ից 6-ը Ռումինիայում Հայաստանի Հանրապետության արտակարգ և լիազոր դեսպան Սերգեյ Մինասյանն աշխատանքային այց է կատարել Տիմիշ նահանգի Տիմիշոարա (Ռումինիայի խոշոր արդյունաբերական ու մշակութային կենտրոն) քաղաք։

Այցի ընթացքում դեսպանը հանդիպել է Տիմիշոարայի փոխքաղաքապետ Ռուբեն Լացկաուի հետ։ Հանդիպման ընթացքում կողմերն անդրադարձել են հայ-ռումինական գիտա-կրթական, մշակութային ու մի շարք այլ ոլորտներում համագործակցության հաստատման ու կապերի ընդլայնման հնարավորություններին՝ ներառյալ Տիմիշոարայի՝ Եվրոպայի 2023թ․ մշակութային մայրաքաղաքի, և Հայաստանի քաղաքաներից մեկի միջև բարեկամության հաստատումը։

Դեսպանը մասնակցել է նաև Ռումինահայոց միության Տիմիշոարայի մասնաճյուղի ջանքերով կազմակերպված (ղեկ․ Պետրու Փափազյան և Գաբրիել Ստեփանյան) «Հայաստանի շաքար» փառատոնի անդրանիկ թողարկմանը, որին ներկա էին և ելույթներով հանդես եկան Տիմիշոարայի փոխքաղաքապետ Ռուբեն Լացկաուն ու Ռումինիահայոց միության նախագահ, Ռումինիայի գրողների միության փոխնախագահ Վարուժան Ոսկանյանը։

Իր բացման խոսքում դեսպան Մինասյանը, մասնավորապես, նշեց, որ դարեր շարունակ հայերը ապրել ու արարել են Տիմիշոարայում ՝ մեծապես նպաստելով քաղաքի զարգացմանը ինչի վառ օրինակն է 1915թ․ Ցեղասպանությունից հետո Թուրքիայից Ռումինիայում հաստատված հայազգի Հարություն Ֆրենկյանի կողմից հիմնված Տիմիշոարայի շաքարի գործարանը, որը եղել է ժամանակի խոշորագույն արդյունաբերական ձեռնարկություններից մեկը։

Այցի շրջանակներում դեսպանը հանդիպումներ է ունեցել Ռումինիայի խորհրդարանի Տիմիշոարայից պատգամավորներ Բեն-Օնի Արդելեանի և Գանց Օվիդիու Վիկտորի, ինչպես նաև Տիմիշոարայի արքեպիսկոպոս, Բանաթի մետրոպոլիտ Իոան Սելեժանի հետ։

Հանդիպումների ընթացքում քննարկվել են քաղաքական, հոգևոր-մշակութային, Ռումինիայում ազգային փոքրամասնությունների պահպանման, միջազգային ու տարածաշրջանային անվտանգությանը վերաբերող հարցերի լայն շրջանակ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր