Կլուժում անցկացվեց «Երբեք չենք մոռանա» խորագրով միջոցառումը

28 ապրիլի, 2022

Ապրիլի 28-ին Տրանսիլվանիայի Կլուժ-Նապոկա քաղաքում Ռումինահայոց միության Կլուժի մասնաճյուղի նախաձեռնությամբ, Տրանսիլվանիայի ազգագրագիտության թանգարանի, Կլուժի համալսարանի հայագիտության ինստիտուտի և Կլուժի նահանգային խորհրդի համագործակցությամբ տեղի ունեցավ «Երբեք չենք մոռանա» խորագրով միջոցառումը՝ նվիրված Հայոց ցեղասպանության 107-րդ տարելիցին:

Ներկաներին տեսաուղերձով դիմեց Ռումինիայում ՀՀ արտակարգ և լիազոր դեսպան Սերգեյ Մինասյանը, ով իր ուղերձում մասնավորապես նշեց. «Թեև պատմական Ռումինիայի տարածքում հայերի ներկայությունն ունի դարերի պատմություն, Ռումինիայի ներկայիս հայ համայնքը հիմնականում բաղկացած է Հայոց ցեղասպանությունը վերապրածների ժառանգներից, ովքեր ավելի քան մեկ դար առաջ ապաստան գտան հյուրասեր ռումինական հողի վրա: Ռումինիան աշխարհի առաջին երկրներից մեկն էր, որը պետական մակարդակով աջակցություն էր ցուցաբերում Հայոց ցեղասպանությունից մազապուրծ եղած հայերին և, հենց այդ նպատակով է, որ Ռումինական թավագորության թույլտվությամբ 1919թ․ ստեղծվեց Ռումինիայի հայերի միությունը։

Անցյալի ցեղասպանությունների ճանաչումը և ոգեկոչումը էական նշանակություն ունեն աշխարհի ցանկացած այլ մասում նման հանցագործությունների կրկնությունը կանխելու, ինչպես նաև արդարության, մարդու արժանապատվության պաշտպանության, անպատժելիության դեմ պայքարի և միջազգային համերաշխության շուրջ համախմբվելու համար»:

Ելույթներով հանդես եկան Կլուժի համալսարանի հայագիտության ինստիտուտի տնօրեն Թուդոր Սըլըջեանը և Կլուժի նահանգային խորհրդի փոխնախագահ Իշտվան Վակարը։ Այնուհետ համայնքի երիտասարդ անդամներից Տանիա Վարդուկան ամփոփ անդրադարձ կատարեց Հայող ցեղասպանության անհերքելի փաստերին ու դրվագներին։

Հաջորդիվ տեղի ունեցավ «ԷԼՄԱՍ» ֆիլմի ցուցադրությունը (ռեժիսորներ Արմինե Ոսկանյան և Անդրեյ Քրիստիան Վլադեսկու), որից հետո ելույթ ունեցավ Գերլայի «Արմենոպոլիս» կամերային երգչախումբը (դիրիժոր Մոլնար Արփադ):

Ավարտին Ռումինահայոց միության Կլուժի մասնաճյուղի նախագահ Կարեն Շեբեշին դիպլոմներ հանձնեց Կլուժի և Ռումինիայի մյուս նահանգների հայ համայնքներին տարիներ շարունակ աջակցություն ցուցաբերած անհատներին, ովքեր իրենց ներդրումն են ունեցել հայկական մշակույթի ու ավանդույթների պահպանման և տարածման գործում։

Միջոցառումը լայնորեն լուսաբանվեց տեղական ԶԼՄ-ների կողմից։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր