Դեսպան Սերգեյ Մինասյանի այցը Ռումինիայի Հարգիտա նահանգի Գեորգեն (պատմական հայաբնակ Ջուրջով) քաղաք՝ մասնակցելու Հայկական արվեստի փառատոնի 11-րդ թողարկմանը

12 սեպտեմբերի, 2021

Սեպտեմբերի 10-ից 12-ը Ռումինիայում դեսպան Սերգեյ Մինասյանը այցելեց Ռումինիայի Հարգիտա նահանգի Գեորգեն (պատմական հայաբնակ Ջուրջով) քաղաք՝ մասնակցելու Հայկական արվեստի փառատոնի 11-րդ թողարկմանը: Այն կազմակերպվել էր Գեորգենի հայ կաթոլիկ միության ղեկավար Լասլո Կուլչարի նախաձեռնությամբ և նվիրված էր Հայաստանի Հանրապետության անկախության 30-ամյակին ու Հայաստանի Հանրապետության և Ռումինիայի միջև դիվանագիտական հարաբերությունների հաստատման 30-ամյա տարեդարձին։

Փառատոնին մասնակցում էին նաև Հարգիտայի նահանգային և Գեորգենի համայնքային իշխանությունների ղեկավարներ, հոգևոր դասի ներկայացուցիչներ, Ռումինիայի տարբեր քաղաքներից ժամանած ռումինահայեր և օտարազգի հյուրեր:

Միջոցառման սկզբում մասնակիցները ծաղկեպսակներ զետեղեցին 1733թ. կառուցված Սբ․ Մարիամ հայկական կաթոլիկ եկեղեցու բակում տեղադրված խաչքարի մոտ, ինչից հետո ներկաներին ողջույնի խոսքով դիմեցին դեսպան Սերգեյ Մինասյանը, Հարգիտայի նահանգապետի տեղակալ Բարտի Տիհամերը և Գեորգեն համայնքի ղեկավար Սերգե Տիբոր-Անդրասը:

Փառատոնի ընթացքում այցելուները հաղորդակից դարձան հայկական մշակույթին ու ավանդույթներին, մասնակցեցին Տրանսիլվանիայի բնակչության շրջանում հայտնի հայկական ավանդական ուտեստների` հուռութի և ականջապուրի պատրաստման մրցույթ-համտեսին, ունկնդրեցին ժողովրդական հոգեթով երգեր ու ակնդրեցին ազգագրական շլացնող պարեր:

Սեպտեմբերի 12-ին Գեորգենի Սբ․ Մարիամ հայկական կաթոլիկ եկեղեցում տեղի ունեցավ հանդիսավոր պատարագ՝ հավարտ որի եկեղեցական երգչախումբը կատարեց ՀՀ պետական օրհներգը:

Այցի ընթացքում դեսպան Մինասյանը հանդիպեց նաև Գեորգեն համայնքի ղեկավար Սերգե Տիբոր-Անդրասին: Հանդիպման ընթացքում կողմերն, ի թիվս այլ հարցերի, քննարկեցին Գեորգեն-Ալավերդի համայնքների հարաբերություններին նոր շունչ հաղորդելու և առկա բարիդրացիական կապերը գործնականում ամրապնդելու հնարավորությունները: Հանդիպման ավարտին կողմերը պայմանավորվեցին ապահովել շարունակականություն՝ փոխհամաձայնեցված ուղղություններով համագործակցության խորացման նպատակով։

Միջոցառումները լայնորեն լուսաբանվեցին տեղական ԶԼՆ-ների կողմից:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր