Հայաստանի տաղավարը Ռումինիայի զբոսաշրջային ցուցահանդեսում

12 փետրվարի, 2026

Փետրվարի 12-15-ը Հայաստանն առաջին անգամ առանձին տաղավարով մասնակցել է Ռումինիայի զբոսաշրջային ցուցահանդեսին (Târgul de Turism al României 2026)։

Ռումինիայում ՀՀ դեսպանության և ՀՀ զբոսաշրջության կոմիտեի հետ համագործակցությամբ, ռումինահայ գործարարների նորաստեղծ Armenian Business Council-ի նախաձեռնությամբ և Հայաստանից զբոսաշրջային օպերատորների ներգրավմամբ, ցուցահանդեսի հազարավոր այցելուներին է ներկայացվել Հայաստանի զբոսաշրջային ներուժը, հարուստ մշակութային ժառանգությունը և ժամանակակից ակտիվ ուղղությունները։

Ցուցահանդեսի շրջանակներում Հայաստանի տաղավար է այցելել Ռումինիայի Էկոնոմիկայի, թվայնացման, ձեռնարկատիրության և զբոսաշրջության նախարար Ամբրոզիե-Իրինեու Դարաուն։ Ցուցահանդեսին հայկական ազգային պարերով հանդես է եկել ռումինահայ համայնքի «Վարդավառ» պարային համույթը։

Ցուցահանդեսի շրջանակներում, փետրվարի 13-ին ՀՀ դեսպան Տիգրան Գալստյանը ՀՀ զբոսաշրջության կոմիտեի նախագահ Լուսինե Գևորգյանի և Armenian Business Council-ի ղեկավար Վահե Հովակիմյանի հետ միասին հանդիպումներ է ունեցել Ռումինիայի Էկոնոմիկայի, թվայնացման, ձեռնարկատիրության և զբոսաշրջության նախարարությունում՝ պետքարտուղար Լաուրենցյու Վիորել Գդեյի, Զբոսաշրջության գլխավոր վարչության գլխավոր տնօրեն Ալին Գրիգորեի և Ռումինիայի պատգամավորների պալատի անդամ Դումիտրու Վադուվայի հետ։

Հանդիպումներին քննարկվել են Հայաստան-Ռումինիա զբոսաշրջային համագործակցության ընդլայնման հնարավորությունները՝ կարևորելով նորաբաց Երևան-Բուխարեստ ուղիղ չվերթի արդյունավետ գործարկումը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր