Բուխարեստում հավատարմագրված դիվանագիտական ներկայացուցչությունների ղեկավարների ամուսիններն այցելել են Անա Ասլանի անվան Գերոնտոլոգիայի և Գերիատրիայի ինստիտուտ

17 մարտի, 2023

Մարտի 17-ին Ռումինիայում Հայաստանի Հանրապետության արտակարգ և լիազոր դեսպան Սերգեյ Մինասյանի տիկնոջ՝ Լիանա Մինասյանի, նախաձեռնությամբ Բուխարեստում հավատարմագրված դիվանագիտական ներկայացուցչությունների ղեկավարների ամուսիններն այցելել են Անա Ասլանի անվան (աշխարհում առաջին) Գերոնտոլոգիայի և Գերիատրիայի ինստիտուտ:

Ինստիտուտը հիմնադրվել է 1952թ․ հայտնի ռումինահայ բժիշկ և գիտնական պրոֆ. Անա Ասլանի (1897-1988) կողմից:

Պրոֆեսոր Ասլանը Բրաիլայում բնակվող բարձրագույն կրթություն ունեցող հայ ընտանիքի կրտսեր դուստրն էր։ Նրա ծննդյան ժամանակ հայրը՝ Մարգարիտ Ասլանը, 54 տարեկան էր, իսկ մայրը՝ Սոֆիա Ասլանը, 20 տարով փոքր հորից։

Նրանց հայտնի ազգականներից էին փիլիսոփա և գրող Գարաբեթ Ասլանը, ինչպես նաև դրամատուրգ Ի. Ասլանը։

Պրոֆեսոր Ասլանը հայտնաբերել է առաջին հակատարիքային միջոցը` Gerovital «Երիտասարդության Էլիքսիր»-ն, որն օգտագործվել է աշխարհի ավելի քան 70 երկրներում:

Ասլանի Gerovital բուժումը ստացել են այնպիսի հայտնի անձինք, ինչպիսին են Մաո Ցզե Դունը, Շառլ դը Գոլը, Պաբլո Պիկասոն, Սըր Ուինսթոն Չերչիլը, Չարլի Չապլինը, Մառլեն Դիտրիխը, Նիկոլաե և Ելենա Չաուշեսկուները, Կոնրադ Ադենանուերը, Արիստոտել Օնասիսը, Ջոն Քենեդին և այլք:

Տարեկան ինստիտուտը բուժում է ավելի քան 14000 հիվանդների՝ ամբողջ աշխարհից:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր