Դեսպան Մինասյանը մասնակցել է Ռումինիայի խորհրդարանում գումարված հատուկ նիստին

28 նոյեմբերի, 2018

Նոյեմբերի 28-ին Ռումինիայում ՀՀ արտակարգ և լիազոր դեսպան Սերգեյ Մինասյանը Բուխարեստում հավատարմագրված դեսպանների հետ միասին մասնակցել է Ռումինիայի խորհրդարանում գումարված հատուկ նիստին, որը նվիրված էր երկրի միավորման 100-ամյակին:

Ռումինիայի բարձրաստիճան ղեկավարներից բացի ելույթներով հանդես եկան խորհրդարանական բոլոր ութ ուժերի ներկայացուցիչները, որոնց թվում էին մեր հայրենակիցներ, խորհրդարանի հայազգի պատգամավորներ, իշխող կոալիցիայի մաս կազմող ALDE կուսակցության անունից հանդես եկող Վարուժան Ոսկանյանն ու խորհրդարանի ազգային փոքրամասնությունների խմբի ղեկավար Վարուժան Փամբուկչյանը:

Վարուժան Ոսկանյանի ելույթը նվիրված էր 100-ամյակի պատգամներին՝ ներկայիս Ռումինիայի հասարակական-քաղաքական զարգացումների համատեքստում:

Ուշագրավ էր Վարուժան Փամբուկչյանի ելույթը, որտեղ նա, անդրադառնալով Ռումինիայի միավորման գործում ազգային փոքրամասնությունների դերակատարությանը, երախտագիտության զգացումով հիշատակեց հայազգի գեներալ Հակոբ Զատիկին: Ռումինական բանակի այս ականավոր զինվորականի հրամանատարությամբ, 100 տարի առաջ նույն այս օրը, ռումինական բանակի 8-րդ հետևակային դիվիզիան մտավ Բուկովինայի պատմական մարզ՝ նախանշելով այդ մարզի միավորումը Ռումինիային: Ելույթն արժանացավ թե իշխող, թե ընդիմադիր ուժերի ներկայացուցիչների բուռն ծափողջույններին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր