Հայկական մշակույթի փառատոն Ռումինիայի պատմական հայաբնակ Ջուրջով քաղաքում

20 սեպտեմբերի, 2016

Ռումինիայի Գեորգեն քաղաքում` պատմական հայաբնակ Ջուրջովում, սեպտեմբերի 9-11-ին տեղի է ունեցել Գեորգենի հայկական մշակույթի 6-րդ փառատոնը:

Փառատոնի շրջանակներում Գեորգենի մերձակա Չոբոտ լեռան վրա` հայ կաթոլիկ մատուռի մոտ, տեղադրվել է վահանակ, որն արձանագրում է Տրանսիլվանիայի այս շրջանում հայերի հաստատման հանգամանքները: (Մոլդովայի եւ Տրանսիլվանիայի միջեւ լեռնանցքը, որով 17-19-րդ դարերին անցնում էին հայերն իրենց անասուններով, անցնում էր Պրիսկայի գագաթով: Ի հիշատակ 1679թ. համաճարակի, Չոբոտ սարի վրա կառուցվել է կաթոլիկ մի մատուռ: Դրա մոտ 1748թ. Կյովեր հայկական գերդաստանի կողմից կաթոլիկ հայերի համար կառուցվել է մի այլ մատուռ, ուր հատկապես այցելում էին տոնական օրերին): Վահանակը քառալեզու է` հայերեն, ռումիներեն, հունգարերեն եւ անգլերեն, տեքստը կազմել է պատմաբան, հայագետ դոկտոր պրոֆեսոր Գարդա Դեժոն: Վահանակը զետեղվել է Տրանսիլվանիայի Հունգարահայոց միության կողմից` աջակցությամբ Հունգարիայի Հայոց խորհրդի եւ Ռումինիայում Հայաստանի Հանրապետության դեսպանության:

Փառատոնի առանցքային միջոցառումներից էր «Տրանսիլվանիայի հայերը անցյալի եւ ապագայի միջեւ» միջազգային կոնֆերանսը, որին մասնակցում էին նաեւ Հունգարիայից հրավիրված հետազոտողներ: Ցուցահանդեսի տեսքով ներկայացվել են Կարացոնի ու Կապդեբո հայկական տոհմիկ ընտանիքների մասին նյութեր:

Փառատոնի գեղարվեստական ու մշակութային ծրագրի շրջանակներում ներկայացվել նաեւ են հայկական երգեր, օպերային արիաներ, ինչպես նաև հատվածներ հայերի վերաբերյալ Տրանսիլվանիայի գրողների աշխատանքներից:

Գեորգենի հայ կաթոլիկ եկեղեցում տրված պատարագին մասնակցել է նաև Ալբա Յուլիայի կաթոլիկ արքեպիսկոպոս, Տրանսիլվանիայի հայ կաթոլիկ համայնքի առաքելական կառավարիչ Գյորգի Յակուբինին:

Հիշեցնենք, որ Գեորգենը եղբայրացած է Հայաստանի Ալավերդի քաղաքի հետ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր