Տուլչա քաղաքում հայկական միջոցառումների մասին

08 սեպտեմբերի, 2016

Հուլիսի 30-ին Ռումինիայի Տուլչա քաղաքում, Էթնիկ ֆիլմերի փառատոնի շրջանակներում, Ռումինիայի Հայոց միության կազմակերպմամբ եւ աջակցությամբ անցկացվեցին հայկական մշակութային միջոցառումներ: Փառատոնին ցուցադրվեց կանադահայ կինոռեժիսոր Ատոմ Էգոյանի «Արարատ» ֆիլմը, իսկ համերգային ծրագրում ելույթ ունեցավ Գեռլա (նախկին Արմենուպոլիս) քաղաքի «Հայաքաղաք» պարի անսամբլը:

Քաղաքի կենտրոնական հրապարակում տեղի ունեցած բացօթյա հայկական երեկոն ներածական խոսքով բացեց Տուլչայի նահանգային խորհրդի խորհրդական, Ռումինիայի Հայոց միության Տուլչայի մասնաճյուղի նախագահ Էդուարդ Լուչիան Սիմիոնը: Կարեւորելով Տուլչայում հայկական միջոցառման անցկացումը, նա նաեւ ջերմորեն ողջունեց Ռումինիայի հայկական տարբեր վայրերից ու համայնքային կենտրոններից այստեղ հավաքված հայրենակիցներին, ՀՀ դեսպանության ներկայացուցչին

Առավոտյան Տուլչայի Սբ. Գրիգոր Լուսավորիչ եկեղեցում (1882թ.) Կոնստանցայի հոգեւոր հովիվ Տ. Օշական քհն. Խաչատրյանի կողմից մատուցվել էր պատարագ:

Միջոցառումների շրջանակում ՀՀ դեսպանության դեսպանորդ Աշոտ Գրիգորյանը ապակենտրոնացված մակարդակով համագործակցության հարցերի շուրջ զրույց ունեցավ նահանգային իշխանությունների ներկայացուցիչների հետ եւ փոխանցեց Տուլչայի նահանգային խորհրդի նախագահ Հորիա Թեոդորեսկուին ուղղված Տավուշի մարզպետ Հովիկ Աբովյանի նամակը:

Տուլչան համանուն նահանգի վարչական կենտրոնն է, որը գտնվում է Ռումինիայի պատմական սեւծովյան Դոբրոջա շրջանում: Տուլչա նահանգի եւ ՀՀ Տավուշի մարզի միջեւ եղբայրական կապեր են հաստատվել 2014 թ.:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր