Հայ պոեզիան ռումինական ամսագրում

24 հունիսի, 2016

Ռումինական գրական-մշակութային «Պոեզիա» պարբերականը, պոետական արվեստի մասին միակ հանդեսը երկրում, որը հրատարակվում է Եվրոպայի ամսագրերի ու հրապարակումների ասոցիացիայի կողմից (Ռումինիայի գրողների միության հովանու ներքո) այս տարվա իր ամառային թողարկման մեջ տպագրել է հայկական ժամանակակից պոեզիան ներկայացնող հինգ բանաստեղծություններ` ռումիներեն թարգմանությամբ: Ամսագրում տպագրվել են Հովհաննես Գրիգորյանի «Հայաստան», Հովհաննես Շիրազի «Իմ սուրբ հայրենիք», Համո Սահյանի «Հայաստան ասելիս»,«Ինչպե՞ս ես» և Պարույր Սևակի «Քիչ ենք, բայց հայ ենք» բանաստեղծությունները` Արշալույս Գուրաու Սարգսյանի թարգմանությամբ: Արշալույս Գուրաու Սարգսյանը Կոնստանցայում բնակվող ռումինահայ բանաստեղծ է, մի քանի ժողովածուների հեղինակ:

Ի դեպ, պարբերականի նախորդ համարում, որը լույս էր տեսել այս գարնանը «Պոեզիա եւ արցունքներ» խորագրով, Արշալույս Գուրաու Սարգսյանի թարգմանությամբ տպագրվել է մի փոքրիկ հատված հայկական ժողովրդական «Սասնա ծռեր» էպոսից, բանաստեղծ ու թարգմանիչ Մարիուս Կելարուի ներկայացմամբ ու մեկնաբանություններով:

Կարևոր է նշել, որ այս հրատարակությունը տարածվում է նաև արտասահմանում, իսկ խմբագրական խորհրդի կազմում ընդգրկված են նշանավոր անուններ Ֆրանսիայից, Գերմանիայից, ԱՄՆ-ից, Մոլդովայից ու Սերբիայից:

Արշալույս Գուրաու Սարգսյանը հայերեն խոսքը հնչեցրել է նաեւ ռումին ազգային պոետ Միհայ Էմինեսկուին նվիրված «Կարոտում եմ Էմինեսկուին» միջոցառմանը, որը կազմակերպվել է հունիսի 15-ին «Սադովեանու» գրական խմբակի եւ «Կորբու մշակութային կենտրոնի» կողմից, Կոնստանցայի Կորբու ծովափում: Նա ընթերցել է Էմինեսկուի բանաստեղծությունները հայերեն ու ռումիներեն լեզուներով` Հակոբ Սիրունու թարգմանությամբ, ապա ներկայացրել է Սիրունու համառոտ դիմանկարը, որպես ռումինահայոց մշակութային խոշոր գործիչ եւ նշանավոր հայագետ: Երեկոյին ուսանողուհի Քրիստինա Օդաբաշյանը հայերեն լեզվով կատարել է նաեւ Միհայ Էմինեսկուի խոսքերով «Ինչու՞ չես գալիս» ու «Երեկոն բլրի վրա» երգերը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր