Ռումինիայում կայացած մարզական միջոցառումների մասին

08 հունիսի, 2016

Ս.թ. մայիսի 27-ից հունիսի 7-ը ռումինական Մամայա քաղաքում ընթանում էր Եվրոպայի կանանց շախմատի անհատական առաջնությունը, որին մասնակցում էին 112 շախմատիստուհիներ եվրոպական 27 երկրներից: Մրցաշարի գլխավոր մրցավարն էր Եվրոպայի շախմատային միության մրցավարական կոմիտեի նախագահ, միջազգային կարգի մրցավար Աշոտ Վարդապետյանը:

Մրցաշարում Հայաստանը ներկայացնում էին չորս շախմատիստուհիներ` Լիլիթ Մկրտչյանը, Մարիա Կուրսովան, Լիլիթ Գալոյանը եւ Մարիա Գեւորգյանը: 8 միավոր հավաքած Լիլիթ Մկրտչյանը գրավեց 4-րդ տեղը: Լիլիթ Մկրտչյանը նաեւ նվաճեց կանանց աշխարհի անհատական առաջնության ուղեգիր, իսկ Հայաստանի մյուս մարզուհիները ավելի համեստ արդյունքներ գրանցեցին:

Մրցաշարի եզրափակիչ օրը` հունիսի 7-ին Մամայա այցելեց Ռումինիայում ՀՀ դեսպանության դեսպանորդ Աշոտ Գրիգորյանը, որը հանդիպեց հայ շախմատիստուհիների հետ` քաջալերելով վերջիններիս եւ մաղթելով մարզական հաջողություններ:

***

Դեսպանորդ Աշոտ Գրիգորյանը մայիսի 28-ից հունիսի 5-ը մասնակցել էր նաեւ Ռումինիայի ԱԳՆ ամենամյա Գավաթի 14-րդ խաղերի շախմատի մրցաշարին եւ գրավել առաջին տեղ: Հունիսի 7-ի երեկոյան Բուխարեստի Դիվանագիտական ակումբում կայացավ խաղերի արդյունքների ամփոփման եւ մրցանակների հանձնման արարողությունը: Շախմատի մրցաշարում հաղթողի մեդալը եւ գավաթը շնորհվեց դեսպանորդ Աշոտ Գրիգորյանին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր