Հայաստանը մասնակցել է Բուխարեստում կազմակերպված «Դեսպանատների փառատոն» միջոցառմանը

06 սեպտեմբերի, 2015

Ռումինիայի արտաքին գործերի նախարարության և «ESCU» հիմնադրամի նախաձեռնությամբ սեպտեմբերի 1-5-ին Բուխարեստում առաջին անգամ անցկացվում է Դեսպանատների փառատոնը, որին մասնակցում է նաև Ռումինիայում ՀՀ դեսպանությունը: Փառատոնը կազմակերպվում է Ռումինիայում դիվանագետի օրվա և տարեկան դիվանագիտական հավաքի կապակցությամբ: Դեսպանատների փառատոնի առաջին թողարկմանը մասնակցում են Ռումինիայում հավատարմագրված շուրջ երկու տասնյակ դեսպանություններ, նույնքան էլ ռումինական տարբեր հաստատություններ:

Փառատոնի հանդիսավոր բացումը կայացավ սեպտեմբերի 1-ին Ռումինիայի Ազգային գրադարանի ցուցասրահում, որի կենտրոնական հատվածում` ՀՀ դեսպանությանը հատկացված տաղավարում, Հայաստանը ներկայացվեց պատմական քարտեզներով, հայոց պատմության էջերը զարդարող 19-րդ դարի իտալացի վարպետների գրաֆիկական աշխատանքներով, հայկական փայտագործության նմուշներով և ժամանակակից Հայաստանը պատկերող լուսանկարներով:

Դեսպանատների փառատոնի շրջանակներում Բուխարեստի կենտրոնական զբոսայգում կազմակերպվում է բացօթյա ցուցադրություն, ուր Հայաստանի դեսպանության տաղավարը հանրամատչելի գրականությամբ ներկայացնում է Հայաստանի մշակութային, զբոսաշրջային և տնտեսական հնարավորությունները, հայ վարպետների ձեռագործ իրեր և հայկական գորգագործության նմուշներ:

«Cinema Studio» կինոթատրոնում` ազգային ֆիլմերի ցուցադրության շրջանակներում, Հայաստանը ներկայանում է ռեժիսոր Արսեն Հակոբյանի «Հայաստանից Եվրոպա» պատմավավերագրական ֆիլմով:

«Բացիր քո մշակույթը» խորագրով Դեսպանատների փառատոնի բացման հանդիսավոր արարողությանը և գալահամերգին ներկա էին Ռումինիայի ԱԳ նախարար Բոգդան Աուրեսկուն, պետքարտուղար Բոգդան Ստանոևիչը, դեսպաններ, մշակութային հաստատությունների ղեկավարներ և արվեստագետներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր