Դեսպան Գասպարյանի հանդիպումները Ֆոկշան քաղաքում

03 հուլիսի, 2015

Հուլիսի 3-ին Ռումինիայում Հայաստանի դեսպան Համլետ Գասպարյանն այցելեց Ֆոկշան` քաղաքի օրերի կապակցությամբ:

Քաղաքապետ Դեչեբալ Բաչինսկու հետ հանդիպմանը քննարկվեցին Ֆոկշանի և Հայաստանի Բերդ քաղաքի միջև կապերի խորացման հարցեր, այդ թվում` Ֆոկշանի հայ համայնքի ներգրավման եղանակներն այդ գործընթացում:

Քաղաքային տոնի կապակցությամբ դեսպանը փոխանցեց Բերդի քաղաքապետ Հարություն Մանուչարյանի շնորհավորական ուղերձը: Այնուհետև Աթենեուլ սրահում նրանք մասնակցեցին քաղաքի օրերի պաշտոնական բացման արարողությանը, որտեղ դեսպան Գասպարյանը հանդես եկավ ողջույնի խոսքով:

Իր ելույթում դեսպանը նշեց, որ քաղաքների եղբայրացումը լավագույն միջոցն է հասարակությունների միջև ուղղակի կապեր հաստատելու և համերաշխ ապագա կառուցելու համար: Անդրադառնալով Հայոց ցեղասպանության 100-րդ տարելիցին, դեսպան Գասպարյանը իր երախտագիտությունը հայտնեց Ռումինիային և ռումին բարեկամ ժողովրդին և Ֆոկշանի հասարակությանը` 1920-ական թվականներին տասնյակ հազարավոր հայ գաղթականների և որբերի ապաստան տրամադրելու համար:

Դեսպանը բարձր գնահատեց ապրիլի 24-ին Ռումինիայի նախագահ Կլաուս Վերներ Յոհաննիսի համերաշխության ուղերձը հայ ժողովրդին, որով նա «այդ պատմական ծավալի ողբերգության ճանաչումը կարևոր և անհրաժեշտ ազդակ է համարում ատելությունը, անհանդուրժողականությունը, ռասիզմը և այլատյացությունը արմատախիլ անելու համար»:

Նույն օրը դեսպան Գասպարյանը հանդիպեց Ֆոկշանի հայ համայնքի հոգևոր և աշխարհիկ ներկայացուցիչների հետ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր