Դեսպան Գասպարյանն իր հավատարմագրերը հանձնեց Չեռնոգորիայի նախագահին

20 նոյեմբերի, 2014

Նոյեմբերի 19-ին Չեռնոգորիայում ՀՀ նորանշանակ դեսպան Համլետ Գասպարյանը (նստավայրը` Բուխարեստ) Չետինյեի նախագահական պալատում իր հավատարմագրերը հանձնեց Չեռնոգորիայի նախագահ Ֆիլիպ Վույանովիչին։

Հավատարմագրերի հանձնման արարողությունից հետո նախագահ Վույանովիչի եւ Հայաստանի դեսպանի միջեւ տեղի ունեցավ առանձնազրույց, որի ընթացքում շոշափվեցին երկու երկրների միջեւ կապերի զարգացման համար իրավապայմանագրային բազայի ստեղծման, բարձր մակարդակով քաղաքական երկխոսության շարունակման եւ երկկողմ հարաբերությունների առաջնահերթությունների որոշման հարցեր: Նախագահ Վույանովիչը կարեւորեց հատկապես տնտեսական համագործակցության զարգացումը եւ այդ ուղղությամբ ջանքերի համատեղումը` գոհունակություն հայտնելով անցյալ տարի ամռանը Չեռնոգորիայում կազմակերպված համատեղ գործարար ֆորումի կապակցությամբ: Առանձնազրույցի ավարտին հաջողություն մաղթելով դեսպանին նոր առաքելության մեջ` Վույանովիչը խնդրեց իր ջերմ բարեմաղթանքները փոխանցել Հայաստանի նախագահին:

Նույն օրը դեսպան Գասպարյանը հանդիպում ունեցավ Չեռնոգորիայի ԱԳՆ Երկկողմ հարցերով գլխավոր վարչության Եվրոպայի վարչության պետ Միրոսլավ Շչեպանովիչի հետ: Քննության առնվեցին երկկողմ օրակարգի բոլոր ուղղությունները:

Նախորդ օրը, դեսպան Գասպարյանը հավատարմագրերի պատճենն էր հանձնել ԱԳՆ Դիվանագիտական արարողակարգի ղեկավար Լյուբոմիր Միշուրովիչին:

Այցի շրջանակներում դեսպան Գասպարյանը հանդիպել էր նաեւ Չեռնոգորիայի հայ համայնքի ներկայացուցիչներին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր