Փոխվարչապետն ընդունեց ռումինացի քաղաքապետների պատվիրակությանը

23 սեպտեմբերի, 2014

ՀՀ փոխվարչապետ, տարածքային կառավարման նախարար Արմեն Գեւորգյանն այսօր ընդունեց ռումինացի քաղաքապետների պատվիրակությանը:

Փոխվարչապետը ողջունեց պատվիրակության այցը Հայաստան՝ ընդգծելով, որ հայկական կողմը կարեւորում է բարեկամ Ռումինիայի հետ ապակենտրոնացված մակարդակով փոխգործակցության խորացումը: Նա նկատեց, որ երկու երկրների միջեւ այդ ձեւաչափով համագործակցության բավականին հետաքրքիր հնարավորություններ են առկա ու գոհունակությամբ արձանագրեց, որ հատկապես վերջին տարիներին նոր կապեր են հաստատվում գործընկեր քաղաքների միջեւ, գործակցության շրջանակներն աստիճանաբար ընդլայնվում են: «Հայաստանի կառավարությունը խրախուսում է բարեկամ երկրների նահանգների եւ քաղաքների հետ ուղիղ շփումները, որոնք նպաստում են ինչպես առեւտրատնտեսական հարաբերությունների զարգացմանը, այնպես էլ ժողովուրդների միջեւ սերտ շփումների հաստատմանը»,-նշեց փոխվարչապետը:

Ռումինացի քաղաքապետները ներկայացրին իրենց քաղաքների հնարավորությունները, տնտեսության ավանդական եւ հեռանկարային ուղղությունները ՝ ընդգծելով, որ շահագրգռված են Հայաստանի գործընկեր քաղաքների հետ հարաբերությունների զարգացմամբ: Հատկապես հետաքրքիր համարվեց զբոսաշրջության, գյուղատնտեսության ոլորտներում գործակցությունը:

Երկկողմ կապերի խորացման գործում կողմերը նաեւ ընդգծեցին Ռումինիայի հայ համայնքի կարեւոր դերը: Նշվեց նաեւ, որ Ռումինիայում հայկական մշակութային ժառանգության հուշարձանների, հատկապես՝ հին հայկական եկեղեցիների առկայությունը հետաքրքիր կարող է լինել զբոսաշրջային ուղղության զարգացման տեսանկյունից:

Ռումինական պատվիրակության այցի ընթացքում նախատեսվում է համագործակցության համաձայնագրերի ստորագրում Տավուշի մարզի եւ Տուլչա նահանգի, Էջմիածին- Սուչավա, Աշտարակ-Բոտոշան, Ալավերդի-Գեորգեն, Վայք - Թրգու Օկնա, Ծաղկաձոր- Սինայա քաղաքների միջեւ, իսկ Իջեւանը եւ Գեռլան կվավերացնեն 2012թ. ստորագրված համագործակցության համաձայնագիրը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր