Սիմպոզիում ռումինական Դումբրավեն քաղաքում

19 մայիսի, 2014

Մայիսի 16-18-ին Տրանսիլվանիայի Դումբրավեն/Dumbraveni քաղաքում տեղական իշխանության, Ռումինիայի Հայոց Միության մասնաճյուղի, Կլուժի/Cluj Բաբեշ Բոլյայի/Babes-Bolyai համալսարանի, Ռումինիական Ակադեմիայի Տրանսիլվանիայի մասնաճյուղի եւ Ռումինիայում ՀՀ դեսպանության մասնակցությամբ անցկացվեց ''Դումբրավենի էթնիկ եւ մշակութային ազդեցությունները'' թեմայով սիմպոզիում: Սիմպոզիումին ներկա էին Դումբրավենի քաղաքապետ Ջորջետա Իրիմիեն/Georgeta Irimie, Սիբիուի/Sibiu նահանգային եւ Թըրգու Մուրեշի/Targu Mures շրջանային խորհրդի անդամներ, Ռումինիայում ՀՀ դեսպանության ներկայացուցիչը, Կլուժի Բաբեշ Բոլյայի համալսարանի պրոռեկտոր Իոան Բոլովանը/Ioan Bolovan, տասնյակ հետազոտողներ:
Հաշվի առնելով հայերի 300-ամյա ներկայությունը Դումբրավենում, որ համարվում է Տրանսիլվանիայի հայկական կենտրոններց մեկը, զեկույցների գերակշռղ մեծամասնությունը նվիրված էին Դումբրավենի հայկական հետքին, ժառանգությանն ու ականավոր անհատներին:
Բաբեշ-Բոլյայի համալսարանի պրոռեկտոր Իոան Բոլովանը եւ համալսարանի Մշակութային ժառանգության դեպարտամենտի ղեկավար Անա Վիկտորիա Սիման/Ana Victoria Sima անգնահատելի համարեցին Տրանսիլվանիայում հաստատված հայերի ներդրումը տարածաշրջանի սոցիալ-տնտեսական եւ կրթա-մշակութային կյանքում, ազգային փոքրամասնությունների համերաշխ գոյակցությանը բերած նպաստին: Բանախոսները վերահաստատեցին Բաբեշ-Բոլյայի համալսարանի գիտական հետաքրքրությունը հայագիտության հանդեպ, այդ թվում նաեւ Հայոց ցեղասպանության 100-ամյակին ընդառաջ ժամանակի պատմական փաստերի վերհանմանը եւ ներկայացմանը:
Սիմպոզիումի մասնակիցներն այցելեցին քաղաքի Տրանսիլվանիայի Հայոց թանգարան եւ 250-ամյա Սբ. Եղիսաբեթ հայ կաթողիկե եկեղեցի, որտեղ ունկնդրեցին հատվածներ հայկական պատարագից:
Հիշեցնենք, որ 2012թ. Դումբրավենը եղբայրացել Հայաստանի Նոյեմբերյան համայնքի հետ, որը լրացուցիչ խթան է քաղաքի հայկական ավանդույթների պահպանման համար:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր