ՀՀ Հանրային խորհրդի նախագահ Վազգեն Մանուկյանի այցը Ռումինիա

05 մարտի, 2014

Ռումինիայում ՀՀ դեսպանության աջակցությամբ եւ Ռումինիայի Հայոց Միության հրավերով ս.թ. մարտի 1-5-ը Բուխարեստում էր գտնվում Հայաստանի Հանրապետության Հանրային խորհրդի նախագահ Վազգեն Մանուկյանը:

Այցի շրջանակներում Վազգեն Մանուկյանը հանրային դասախոսություններով հանդես եկավ Բուխարեստի առաջատար քաղաքագիտական-վերլուծական կենտրոններում՝ Բուխարեստի Տիտուլեսկու Եվրոպական հաստատությունում/Titulescu European Foundation եւ Ռումինական Ակադեմիային կից Հարավ-Արեւելյան եվրոպական ուսումնասիրությունների ինստիտուտում/Institute for Southeastern European Studies: Ելույթներում ներկայացվեցին Հայաստանի անկախության ուղին, Ղարաբաղյան շարժման պատմությունը, արտաքին քաղաքական ներկա մարտահրավերները, այդ թվում Արցախյան հիմնախնդիրն ու հայ-թուրքական հարաբերությունները, Հայաստանի եվրաինտեգրման ուղին ու տարածաշրջանային վերջին զարգացումները:

Տիտուլեսկու Եվրոպական հաստատությունում, ուր Վազգեն Մանուկյանի ելույթին հետեւեցին հարցուպատասխաններ, ներկա էին Ռումինիայի ԱԳՆ բարձրաստիճան պաշտոնյաներ, Ռումինիայում հավատարմագրված դիվանագիտական ներկայացուցչությունների ղեկավարներ, քաղաքագետներ, վերլուծաբաններ եւ լրագրողներ:

Այցի շրջանակներում Վազգեն Մանուկյանը հանդիպումներ ունեցավ Ռումինիայի խորհրդարանի Հայաստան-Ռումինիա բարեկամության խմբի նախագահ Աուրել Վլադոյուի/Aurel Vladoiu, Ռումինիայի Տնտեսական եւ սոցիալական խորհրդի նախագահ Ֆլորիան Կոստակեի/Florian Costache, ինչպես նաեւ Ռումինիայի Հայոց միության նախագահ Վարուժան Ոսկանյանի ու Ռումինիայի խորհրդարանի փոքրամասնությունների խմբի ղեկավար Վարուժան Փամբուկչյանի հետ:

Վազգեն Մանուկյանի այցը եւ ելույթները լայնորեն լուսաբանվեցին ռումինական լրատվամիջոցների կողմից: Հանրային խորհրդի նախագահը հարցազրույցներ տվեց ռումինական Geostrategic Pulse քաղաքագիտական հանդեսին, Digi 24 հեռուստաընկերությանը եւ Աժերպրես/AGERPRES լրատվական գործակալությանը:

Այցի շրջանակներում Վազգեն Մանուկյանը Հայ մշակույթի տանը հանդիպեց հայ համայնքի ներկայացուցիչներին եւ մասնակցեց Սումգայիթի զոհերի ոգեկոչման պատարագին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր