Հայկական երաժշտության երեկո Տիմիշոարայի ֆիլհարմոնիայում

18 նոյեմբերի, 2013

Նոյեմբերի 15-ին ռումինական Տիմիշոարա քաղաքի Բանատի ֆիլհարմոնիան Ռումինիայում ՀՀ դեսպանության հետ համագործակցությամբ կազմակերպել էր հայկական երաժշտության երեկո: Քաղաքի Կապիտոլ մեծ համերգասրահը հյուրընկալել էր ռումինական Սոնուս եռյակին եւ սոպրանո Վիկտորյա Պետրոսյանին (Հայաստան), որոնց կատարմամբ հնչեցին Կոմիտասի, Խաչատուր Ավետիսյանի, Գուսան Շահենի, Լեւոն Մինասյանի հանրահայտ գործերը եւ հայկական ժողովրդական մեղեդիներ։

Ռումինական Սոնուս եռյակի երգացանկի մեջ առյուծի բաժին են կազմում հայկական մոտիվները՝ շնորհիվ մենակատար Կոսմին Բալեանի ոգեշնչման, ով վերջին երեք տարիներին մասնագիտացել ու ռումինական երաժշտասերին է ներկայացնում հայկական դուդուկը եւ թավ շվին՝ տաղանդաշատ երաժիշտներ Դորու Ռոմանի (թմբուկ, մարիմբա) եւ Լաուրա Ռոմանի (ջութակ) նվագակցությամբ։ Ռումին հանդիսատեսին հայկական երաժշտության առավել ամբողջական պատկեր հաղորդելու նպատակով Սոնուս եռյակն այս անգամ հրավիրել էր սոպրանո Վիկտորյա Պետրոսյանին, ով երաժշտական երեկոն հագեցրեց կոմիտասյան երգացանկի վարպետ կատարումներով։

Ինչպես ռումինական մամուլն է գրում համերգի մասին, Տիմիշոարայի հանդիսատեսը հայտնագործեց “ծիրանի փայտից դուդուկի քնքուշ, թախծոտ, քարերին լացացնող ու երգեցնող մեղեդիները” եւ “հանդիսատեսի համար անակնկալ դարձած հայ երգչուհու խորունկ եւ կարոտալից ելեւէջներով գեղեցիկ ձայնը”։

Համերգի օրը Բանատի ֆիլհարմոնիկի նախասրահում ներկայացվեց նաեւ Հայաստանի մասին պատմող հանրամատչելի գրքույկների եւ նյութերի ցուցադրություն։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր