Ռումինիայում հայերի ներկայությանը նվիրված դասախոսություն Բուխարեստում

12 դեկտեմբերի, 2011

Ս/թ դեկտեմբերի 10-ին ռումինական Կալեա Վիկտորիա հաստատության նախաձեռնությամբ Բուխարեստի Հայկական մշակութային կենտրոնում տեղի ունեցավ դասախոսություն ռումինական տարածքների վրա հայոց ներկայության վերաբերյալ: Պատմական գիտությունների դոկտոր տիկին Ջորջետա Ֆիլիտին/Georgeta Filitti եւ Հայր Եզրասը/P. Ezras, Paul Bogdan հետաքրքրասեր ռումին ունկնդիրներին ներկայացրեցին 10-րդ դարից ի վեր ռումինական հողերի վրա հաստատված հայերի պատմությունը, նրանց խոշոր ավանդը երկրի զարգացման մեջ մշակութային, հոգեւոր, տնտեսական եւ քաղաքական ոլորտներում:

Համաշխարհային քաղաքակրթության մեջ հայերի խաղացած յուրահատուկ դերի մասին խոսքերով հանդես եկան Ռումինիայի Հայոց թեմի առաջնորդ Տ. Տաթեւ Եպս. Հակոբյանը եւ Ռումինիայում Հայաստանի դեսպան Համլետ Գասպարյանը:

Այնուհետեւ ռումին ունկնդիրներն այցելեցին Բուխարեստի Սուրբ Հրեշտակապետաց Հայոց եկեղեցի, ծանոթացան Հայոց թանգարանի եւ գրադարանի հետաքրքիր եւ հարուստ նյութերին:

Կալեա Վիկտորիա հաստատությունը/Fundatia Calea Victoriei/ հիմնվել է 2008թ. եւ ռումին երիտասարդության ու հասուն տարիքի ունկնդիրների համար կազմակերպում է դասախոսություններ եւ մշակութային միջոցառումներ պատմության եւ հումանիտար այլ ոլորտների վերաբերյալ, որտեղ հանդես են գալիս հայտնի գիտնականներ, հետազոտողներ եւ մշակութային ու հանրային գործիչներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր