Դեսպան Մինասյանի աշխատանքային այցը Կլուժ-Նապոկա քաղաք

05 մարտի, 2023

Մարտի 4-ից 5-ը Ռումինիայում Հայաստանի Հանրապետության դեսպան Սերգեյ Մինասյանն այցելեց Կլուժ-Նապոկա քաղաք, որտեղ հանդիպումներ ունեցավ Կլուժ նահանգի ՏԻՄ ղեկավարների, համալսարանական ու գործարար շրջանակների ներկայացուցիչների, ինչպես նաև տեղի համայնքային ու եկեղեցական կառույցների ղեկավարների հետ:

Մարտի 4-ին, Ռումինիայի առաջատար համալսարաններից մեկում՝ Կլուժ-Նապոկայի գյուղատնտեսական գիտությունների և անասնաբուժական բժշկագիտության համալսարանում, դեսպան Մինասյանը մասնակցեց BIOTERRA Օրգանական գյուղատնտեսության 18-րդ համաժողովին, որին մասնակցում էին և ելույթներով հանդես եկան Ռումինիայի փոխվարչապետ Հունոր Կելեմենը, Հունգարիայի գյուղատնտեսության նախարար Իշտվան Նագին, Կլուժի գյուղատնտեսական գիտությունների և անասնաբուժական բժշկագիտության համալսարանի ռեկտոր Կորնել Կատոյը և բազմաթիվ այլ պաշտոնյաներ ու հյուրեր մոտ մեկ տասնյակ երկրներից։

Իր բացման խոսքում դեսպան Մինասյանը ընդգծեց երկու երկրների միջև ոչ միայն դիվանագիտական, այլև մշակույթի, կրթության, գյուղատնտեսության և այլ ոլորտներում համագործակցության կարևորությունը՝ ներկայացնելով ՀՀ կառավարության և համապատասխան կառույցների ջանքերը՝ ավելացնելու օրգանական գյուղատնտեսական արտադրությունը և բարելավելու ԵՄ օրգանական կանոնակարգերի ու Սննդի գրքի (Codex Alimentarius) օրգանական ուղեցույցերի պահանջները։

Միջոցառմանը Հայաստանից մասնակցում էին «Կանաչ արահետ» գյուղատնտեսության աջակցության հասարակական կազմակերպության ներկայացուցիչները (ղեկ․՝ Նունե Սարուխանյան), ում հետ միասին դեսպան Մինասյանը հանդիպումներ ունեցավ ռումինացի գործընկերների հետ, այցելեց գյուղատնտեսական արտադրավայրեր՝ տեղում ծանոթանալու արտադրական գործունեությանը։ Կողմերը քննարկեցին հայ գյուղատնտեսների հետ կապերի հաստատման ու փոխշահավետ համագործակցության հնարավորությունները։

Այցի շրջանակներում դեսպան Մինասյանը հանդիպում ունեցավ նաև Կլուժ-Նապոկայի գյուղատնտեսական գիտությունների և անասնաբուժական բժշկագիտության համալսարանի ռեկտոր Կորնել Կատոյի հետ։ Հանդիպման ընթացքում քննարկվեցին Հայաստանի ազգային ագրարային համալսարանի հետ համագործակցության հեռանկարները՝ նոր տեխնոլոգիաների փորձարկման ու փորձի փոխանակման միջոցով նպաստելու ոլորտի զարգացմանը։ Դեսպան Մինասյանըը գրառում կատարեց Համալսարանի պատվավոր հյուրերի գրքում։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր